Se tasi o Ipu ale Mafutaga

Se tasi o Ipu ale Mafutaga

O le soifua tautua lotu o tagata Samoa, e latou te lē matau ai i ni faaletonu, ae taulai pea lana silasila i le Atua o loo Faavae ai Samoa auā le tautuaina o lana Feau ma lana Galuega.

O lagona ia o nisi o tamā matutua o le atunuu, sa auai ai i le faamoemoe o le afioaga o Avao, e ala lea i le sailiga seleni ale ekalesia Metotisi e pei ona malaga mai ai le susuga i le Tausi Matagaluega ia Pulea Tiumalu ma le afioga i le Tofi o le Itumalo le susuga ia Nafo’i Talaimanu, le susuga i le Komiti Tumau ae tainane le afioga ia Leota ma Seuamuli ma le mamalu o le faigamalaga mai Samoa.

O le paia lea auā le afio o le Aiga Sa Peseta, le Maopu ma le Usoalii, ae tainane le nofo ituaiga i le Faleiva ma Oe le Matautu, le faamamaluga o Malo.

O le Aso Toonai 21 o Aperila 2018, na faatasia ai Papa i Puleia, i le afioga i le alii Sea ia Falo ma le Peresetene Sili o le Sinoti, ma le paia o le Faasinoti a Niu Sa Uelese. Ae faapea foi susuga i Toeaiina ia Kolia Fiu Kolia ma le Toeaina ia Simeona Taefu, le paia i Aiga ma Tapaau ma le mamalu o le Faleupolu ma Samoa potopoto, ona o le talo faaaloalo mai ale Mafutaga a Alo ma Fanau ale afioaga o Avao i Sini, ae faapea foi se faapiipii le mau a le Malaga mai Samoa, ona o le moomia lea o le fesoasoani, auā le ala ma le galuega ale Atua i le afioaga.

E ui lava ina sa tufatufaina atu tusi valaau i le paia o le Aufaigaluega ale Atua ma ekalesia ma le mamalu o Samoa, ae o le po lava o le Aso Tofi na faatoa faafofoga ai le atunuu i luga o le 2FS-Radio, ina ua faatalanoaina ai le afioga i le Ma’opu ia Leota, ina ua ia saunoa ma tatalaina ai le avei o le faamoemoe e pei ona faataunuuina ai ilea so Toonai,

E maeu lava le agaga faitaulaga o nai o tatou tagata, auā e lei mategataina le manuia o le faamoemoe ina ua vaaia ai le faatumulia o le hall a le Police Citizens Youth Club i le pitonuu o Shelvey.

O le taumafataga atoa o le aso, na maamaau i ai le Tina o le Galuega, le Faletua o le susuga i le Toeaina ia Sootuli ma le paia o le Aulotu EFKS a Campbelltown. Ia o tala lava o Alo le tuumumusu a le atunuu, i le matagofie ma le felanuai o le taumafataga. O se auaunaga totogi (Catering Service) o loo faatinoina pea e tautuaina ai le Feau ma le Galuega ale Atua ale Aulotu lava a Campbelltown.

Na amataina lava i le sauniga lotu puupuu, na taitaiina lava lea e le afioga i le alii Sea, ona faagasolo ai lea o le polokalama o aso faapenei, e ala lea i saasaaga faasamoa a le mamalu o le atunuu ma le paia o le aufailotu, ae faapea foi ipu a matafale taitasi o le Mafutaga aemaise ai o le faigamalaga mai Samoa, lea ua latou sapaia ai faatuaeleele ai nei le $145,396.70 Ausetalia.

E lei māmā i le susuga i le Tausi Matagaluega ma le Faigamalaga lea agalelei o Samoa o Sini, ae a le i le alii Sea ma le Au Toeaiina ma ekalesia, faapea foi i mafutaga a nuu ma afioaga, aemaise lava i le Faasinoti.

O se tasi foi o foai maoa’e lava o lea aso, o se tasi lava tamā o le afioaga, ua molimau lava i ai le afioaga i lana faigataulaga e faia pea i soo se galuega lava a soo se ekalesia i totonu lava o le afioaga, na te foaiina ai lava le $10,000 Samoa. O lea foi sa faatinoina lava e nai ona alo mai Melepone na malaga faapitoa mai lava e momoli lea faigataulaga a lo latou Tuaa.

O le fofoga o le aso, sa nafa lava lea ma le Sui o le Mafutaga a Alo ma Fanau a Avao i Sini, ae o le faafetai i tulaga faaleaganuu na fofogaina lea e le afioga i le Tofi o le Itumalo, ia Nafo’i Talaimanu auā le agaga ua tumu i le malie auā ua taumasuasua le faaaloalo e ala i le alofa foai. Ae o faaaloaloga e ala i le Malo paia na aao i ai le Tausi Matagaluega ma le Matagaluega mai Avao, na nafa lea ma le Tofa ia Lealaiauloto Peni.

I le sivaloa ma le faatau paia i Aiga ma le atunuu, ae tainane foi o le nofo a Ekalesia i le Faasinoti ma le Pulega a Sini i Saute ma le Pulega a Sini i Sisifo, na tasi ai le tafa ma le moe o le Matua Fetalai (le tofa ia Mulitalo Arasi) e molimoliina le agaga faafetai ona o le aso ua auau tetele i tiuga ma faaaloaloga ale afioaga.

I lona taualuga na saunoa i ai le Aufaigaluega e ala i le alii Sea, i le timaiga faaleagaga ma le tatalo faamanuia ona tatala ai lea o le filialii ma ta’ape, o si manu ma si ana i’a.

Comments

comments