A faalagi le itupa o tina ma tamaitai i le gagana masani, ona faapea lea, o le Itupa Vaivai. Ae a faaleo loa le fuaitau ua lauvivilu i ai le atunuu “E au le Inailau a Tina”, ona ese lea o le vaai a Samoa i le Itupa Vaivai, e peiseai o le Inailau a Tina, o le Itupa fai mea mafai, e sili atu ona filigā nai lo le Itupa o Tamā.
O le agaga lea na lagona i tulimanu e fā o le New Lynn Community Hall i le po o le Aso Toonai na tea nei, 07 Tesema 2013, ina ua tauaaoina faailoga faapitoa e faatāuaina ma patipatia ai le sao ma le tautua matavela o tina ma tamaitai Samoa, i totonu o aiga, nuu ma ekalesia aemaise pisinisi ma galuega, ma Upufai o Malo. O le taimi muamua foi lenei ua faia ai se faamoemoe faapenei i totonu o Aukilani e amanaia ai tina ma tamaitai Samoa.
O le po foi lea sa tatala ma faalauiloa aloaia ai le CD pese ua faaigoaina o le Inailau a Tina, sa tuufaatasia e le afioga ia Lealaitagomoa Ga‘ono Elsie Luafatasaga Kalapu Ropati, faapea le afioga ia Faumuina Taufau Gardenia Faaolatane Vagai Aukuso, ma le tausi ia Gaylene Filoa Akelly. O i latou foi nei sa saunia le Inailau a Tina Award e pei ona tauaaoina i lea po.
O se faamoemoe na lagolagoina e le atunuu aemaise le itupa o tina ma tamaitai, na molimauina le lolofi atu e auai. E leai ma se nofoa e tasi na avanoa o le Hall, na matuai faatumulia tulimanu uma e fā i le mamalu o le atunuu na faatasi atu e molimauina le faamoemoe.
O le sauniga amata na taitaia e le susuga i le Faafeagaiga ia Pastor Marie Ropeti Ainuu, ae o le saunoaga na aami na saunoa i ai le afioga i le Konesula Aoao o le Malo Samoa, le afioga ia Faolotoi Reupena Pogi, o ia foi na tauaaoina faailoga faapitoa mo tina sa lautogia, ae lagolago i ai le Susuga ia Toaletai David Tua.
O se po sa talatala ai galuega lelei, aemaise o matatia maoa‘e ua ausia e tina ma tamaitai Samoa, e pei ona molimauina e tina na tauaaoina i ai nei faailoga faapitoa.
O nisi o saunoaga o lea po na toe tata‘i i tua i le taimi o Nafanua le Atua o taua, o se tamaitai na tauina taua o Ao o Samoa, na ia ave uma i Fili ma Puletuu Ao e fā o le atunuu, mulimuli ane faaee uma mamalu i le tamaitai o Salamasina o ia o le uluai Tafaifā o Samoa, o le tupuaga o le Aiga Salevalasi. O se po foi na lagona ai e tina ma tamaitai o Samoa lagona o le faaeaina ma le amanaia.
E toalima tina sa tuuina atu i ai nei faailoga faapitoa. O le afioga i le tamaitai faipule o le malo Niu Sila ia Leaufaamulia Asenati Lole Taylor, o le afioga i le tamaitai Loia ma o le tuaa foi o le alii lakapi lauiloa i le Lalolagi, Eliota Sapolu, le afioga ia Unasa Iuni Sapolu.
O le afioga i le tamaitai Loia ua lauiloa i lana tautua e lē gata i Samoa, Niu Sila ae o atunuu i fafo, le afioga ia Leulua‘ialii Olinda Woodroffe.
O le afioga ia Talaleomalie Mena Mata‘utia Loheni, o le Faatonu ma o ia na faavaeina le kamupani lauiloa o le MENA’s Fashion ua faatūina ona lala i Samoa, Niu Sila ma isi atunuu o le Pasefika, faapea le afioga ia Lea‘utuli‘ilagi Taotua Malaetā Sauvao o se tina ua iloga lana tautua faafaiaoga i totonu o Niu Sila, o ia foi o le Peresitene o le FAGASA o le tusitala foi o le tusi ua faaigoina o le Sulatoga a Samoa.
Na tofu saunoa i latou uma i le taimi na tauaaoina ai o latou faailoga, na faateia i latou uma ona o le faaaloalo na tauaaoina mo i latou, e lē o se tulaga sa mafaufauina, peitai, ua avea ma auala e patipatia ai e Samoa atoa le tautua a tina ma tamaitai Samoa. O le fofoga o le po o le afioga ia Leulua‘ialii Savea Al Harrington Lavea, na lagolago i ai le tamaitai o Metotisi Komiti Faalavaau, o le Miss Samoa NZ 2011-2012.
Na faaopoopoina le fiafia o tina ina ua faafofoga i le siufofoga mālie o le afioga ia Fesolai Willie Tavita, na ia lagiina mo le taimi muamua i luma o se faapotopotoga lana pese faapitoa mo tina “Tina ea e tumu i le Alofa” ae taualuga e le siufofoga mālie o le tamaitai pese lauiloa ia Marina Davis na tutulai ai tina ma sisiva mai lava i le laulau o loo nofo ai i le fiafia.
I le agaga fiafia i le faaaloalo, na saunoa ai le tamaitai loia ia Olinda Woodroffe ma ia faimealofa ai mo le Inailau a Tina, e $5,000 le tau o le tautua o le a ia galue ai e puipuia faatulafono meatotino a le Inailau a Tina.
E lē gata i lea sa tauaaoina foi e le Inailau a Tina se meaalofa tupe na tauaao mamao mai lava i Iapani e le alii lakapi lauiloa, le Susuga ia Eliota Sapolu e lagolagosua ai mo le faamoemoe.
O lagona o le tagata e tautua e la tu lava i le fuaitau lenei, “A uma ona tatou faia se mea lelei, ona tatou faapea ane lea, o tatou lava o ni auauna le aoga.”
Ua iai le faamoemoe o le tausaga fou 2014, o le a faatinoina ai foi lenei lava faamoemoe mo Tina ma Tamaitai Samoa. Ae mo le silafia, o lea foi ua amata faatau atu nei i tua le CD pese fou a le Inailau a Tina; asiasi ane i le Samoa Video Center poo faleoloa masani.
