Ua lē nofo lelei i loto ma lagona o nisi o sui tamaitai o loo sauni e tauva i le palota tele a le atunuu ia Mati, le autu o le a latou talanoaina i se Palemene faataitai ua faatulaga o le a faia i le Aso Lulu o le vaiaso nei, aso 20 o Ianuari 2016.
Ua mafua ona ilitata lagona o nisi ona o le autu ua faailoa atu e le Failautusi o le Fono Aoao o le a latou talanoaina o le faaipoipoga a tagata tutusa poo le same sex marriage.
O le tofa Namulau‘ulu Dr Gaualofa Potoi o se tasi o sui tauva o loo i totonu o le faafaletui o tamaitai poo se faalapotopotoga ua faaigoaina o le Samoa Ala Mai, o loo faia tapenaga mo tamaitai auā le faiga filifiliga a le atunuu.
O le mafutaga faaleaoaoga poo se workshop a le faafaletui sa faia i le faletalimalo o le Moanalisa i Vaitele i le vaiaso ua mavae, na folasia ai se pepa a le Failautusi o le Fono Aoao le afioga Fepuleai Atila lea sa talanoaina ai foi ma tapenaga mo se Palemene faataitai o le a felafolafoai ai sui tauva tamaitai.
Na faailoa ai e le failautusi le autu o le a talanoaina, ma o le mafuaaga lea o le faaumiumi teisi o le faatasiga i itula o le taeao o le Aso Faraile na tea nei, a o lei faia malologa o le aoauli, ona sa faaalia ni lagona o nisi o sui tauva i lo latou lē talia o le autu o le a talanoaina i le Palemene faataitai. Faaalia i se finagalo o Namulau‘ulu e faigata tele le autu ona afai o le a molimauina e le autusitala ma le aufaasalalau mo le faasalalauina mo le silafia e le atunuu, o le a mafai ona fausia ai ni lagona aamu poo le lē fiafia i tagata o le atunuu aemaise lava o tagata palota.
Sa tuuina atu ai se manatu o Namulau‘ulu pe faamata ae faatino le faamoemoe ma talanoa le autu o faaipoipoga a ituaiga o tagata tutusa ae taofia le autusitala ma le aufaasalalau ona lipotia.
Sa fautuaina e le tasi o sui tauva le afioga Maiava Visekota Peteru ae ā pe a tuuina atu se pili poo se tulafono taufaaofi ua pasia e le Palemene e agai i ai manatu faaalia poo felafolafoaiga.
Peitai na faaalia e le failautusi o le Fono Aoao, o le tele lava o pili laiti ua pasia o tulafono i le siitaga o lafoga totogi i luga o oloa ae e leai nisi e fia talanoa i ia ituaiga o tulafono.
O le ofisa o le Fono Aoao o loo tapenaina le Palemene faataitai mo sui tauva tamaitai, ma o latou foi na filifilia le autu e fai i ai felafolafoaiga. Na toe suia le lagona o le tofa Namulau‘ulu Gaualofa Potoi ma ia ioe ai i le tāua o le galuega a tusitala e faalauiloa ai le latou taumafaiga e ala i le lipotia ma molimauina le latou Palemene faataitai.
