Ua lē faia e le Loia sili a le Malo ni moliaga faasaga i nisi o itutino o faasalalauga le media i le atunuu na latou faasalalau le lipoti a le Pule ma Suetusi sili, a o loma ai le talanoaina e le Palemene o le lipoti.
O le finauga i le mataupu lenei na iloga ona faamamafa ai e le faatonu o se tasi o nusipepa sana faasalalauga o le lipoti, i sona manatu faaalia i le agavaa o le aufaasalalau e faalauiloa le lipoti ona ua mae‘a ona faataatia i le Palemene.
Peitai o le finauga a le Fofoga Fetalai e lē o aiaiga ia o tulafono tumau ma le tulafono o tulaga aloaia a le Palemene. O lona finagalo e faatoa avanoa ona faasalalau se pepa a le Palemene e pei o se lipoti pe a mae‘a ona soalaupule e sui mamalu o le fono aoao faitulafono.
E ui ua aumai se fautuaga a le Loia sili i le lē faia o ni moliaga ae ua na faamamafa mai i le aufaasalalau le tāua o le amanaia ma faaaloalo i tulaga aloaia o galuega a le Palemene, ae o le a liliu le Sa o le Fofoga Fetalai ma faia se isi faaiuga ua na tuuina atu ai le aufaasalalau ma tusitala na lē usitaia le faasalalauina o le lipoti a le Suetusi sili, i le komiti o amioga taualoa ma tulaga aloaia le Parliament Priviledge Committee e soalaupule ai ma faia se faaiuga e tusa o aiaiga o tulafono tumau o loo faafoe ai galuega ma tiutefai a le Palemene.
Ua iai faasalaga a le Palemene e faia faasaga i ni faasalalauga poo ni tagata latou te lē usitaia tulaga aloaia a le Palemene. O le finagalo o le Fofoga o le fono, o le suesuega a le Loia sili a le Malo ua faamaonia ai le solia e le aufaasalalau o tulafono a le Palemene.
O le mataupu lenei na afua mai i le lipoti a le Suetusi sili o loo folasia ai faaletonu i le faaaogāina o seleni ma aseta a le atunuu i nisi o Matagaluega ma faalapotopotoga a le Malo. O le faalapotopotog o eleele a le Malo o loo aofia i ni faaletonu e tusa o le taunuuga o sailiiliga a le Loia sili.
O le lipoti lava lea na aliae ai ma tuua‘iga faasaga i le Minisita sa tauaveina lea faalapotopotoga i le faigamalo ua mavae a le HRPP, le afioga Faumuina Tiatia Liuga. E pei ona silafia o ni tuua‘iga na agai ai ma lagona lē fiafia o nisi o faipule o le HRPP ma latou finauina le taitai ma le afioga i le Palemia ua tatau ona faasee ese Faumuina ma le kapeneta.
O lagona lagomia ia o nisi o faipule o le itu a le Malo na mafua ai ona fono le faafaletui a le HRPP ma soalaupule ai tuua‘iga ma faia ai le palota na manumalo ai le lagolagoina pea o Faumuina e avea ma minisita.
Peitai ina ua salalau le lipoti a le Suetusi sili i lomiga a se tasi o nusipepa na atili ai ona lagalagā manatu ma lagona o faipule o le HRPP e aofia ai ma nisi o minisita o le kapeneta ma finau ai pea ua tatau ona faamalolo le tofi minisita o le faipule o Palauli le Falefa, lea ua taunuu ina ua faia lana faamavaega i luma o le Palemene, ma tali atu ai foi i tuua‘iga.
