Iila atili Anthony Milford

Aupega malosi a le Broncos, le alii o Anthony Milford
Aupega malosi a le Broncos, le alii o Anthony Milford

I taaloga o le vaiaso lona ono o le NRL na vaaia ai foi le mataina o nisi o alo o Samoa ia latou kalapu e pei o le alii iloga le numera ono a le Brisbane Broncos ia Anthony Milford lea na sikoa toe ova ana kiki e fā i le pou mo ‘ai faaiu o le Broncos 26-0 a le Dragons.

Na amata mai lava le taamilosaga o sasao pea le leaga o lenei alo o Samoa na se‘i mai lava e Ausetalia mo le Broncos ma fuafua mo le Origin ma lana aufili talu na sasao mo le Toa Samoa i le Ipu o le lalolagi i le 2013.

O se tasi foi o sui tuai o Manly ia Steve Matai lea e logologoa tele i lana pue malosi sa taulamua foi i le laina i tua a le Sea Eagles i lana lami 34-18 a le Warriors na faia i Aukilani.

O lenei taalo a Steve Matai ua toe agai i ai le pulega a le Toa Samoa e ono iloilo mo lana ‘au e fetaui ma Toga i le aso fitu o Me i Parramatta.

O le molimau a nisi i le liki o le ituaiga taalo lea e moomia e faafetauia le malosi o Toga sa tatou malo ai i le tausaga talu ai i le taaloga na faia i le Gold Coast ae faia‘ina ai i le 2013 i Penrith.

O nisi o Centres e ono tauva ma Matai i lea tulaga e aofia ai Tim Lafai, Chase  Stanley, David Nofoaluma ma Ricky Leutele.

I le taaloga lava lea na lami ai Manly 34-18 a le Warriors na sikoa ai foi le alo Samoa ia Martin Taupau i le laina i luma ma toe faailoa atu ai foi i le pulega a le Kiwi lona sauni e tau mo Niu sila i le taaloga ma Ausetalia e faia i Newcastle i le Aso Faraile 6 Me.

O Martin Taupau e faapei o Milford na taalo mo Samoa i le Ipu o le Lalolagi i le 2013 piki ai loa e Niu Sila ma fao ese ai lea taleni. O lana tamoe aemaise foi le pue ua fai ai Taupau ma uo a le toatele e maimoaina le liki auā e pue, tee, tamoe sa‘o lava i lana paga i le lagona o le puapuagatia.

Ae i se tala faanoanoa ua faamanu‘alia nei Sauaso Sue i le taaloga a le Knights 18-16 a le West Tigers i se manu‘aga o le ulu (concussion) ma e lē o mailoa le umi e malolo ai lenei faataumoa a le Toa Samoa i ana taaloga ua tuanai.