Atonu na pau lea o sina leo ma sina faaupuga e mafai ona tatou gagana ane ai, ma manatua ai le alo atu o le afioga ia Toailetai David Tua, mo le isi ana taaloga o loo sosoo ai nei.
O le aoauli o le aso ananafi na tuua ai e Tua Niu Sila mo Amerika, ona o lona faamoemoe e tapena ai ma sauni mo lana taaloga, lea o le a fetaui ai ma le alii fusu o Monte Two Gunz Barett.
O le taaloga lenei sa fuafuaina e faia i le aso 26 o le masina o Iuni o le tausaga nei lava, peitai ua toe tolopoina i le masina o Iulai i le aso 17, a o le aso 18 lea i le taimi a Niu Sila.
E le gata i lea, ae sa fuafuaina foi e faia lea taaloga i Sao Paulo i Brazil, peitai ua suia foi ma o le a faataunuuina i Tropicana Casino i le Atlantic i Amerika lava i le setete o New Jersey.
O le suiga fou ua iai nei, e le gata i le aso e faia ai ae faapea foi le nofoaga o le a faataunuuina ai, e pei ona faailoa mai i se pepa o faamatalga tuusa‘o mai le ofisa o loo nafa ma le faalauiloaina o fusuaga a Tua, i Amerika, le peresitene o le Gotham Boxing, Cedric Kushner.
Sa faailoa foi e Kushner, lona matua faafetai tele i se tasi o tagata iloga o Joe DeGuardia, sa fesoasoani tele mo le taumafai e toe faafoi ane le fusuaga i le nofoaga fou ma le itu o Amerika lea o le a faataunuuina ai le faamoemoe o Tua.
E foliga mai i le faamatalga a le Kushner, e sili atu le tulaga manuia mo le faamoemoe o Tua i le vaega e pei ona faamoemoe nei i ai i lona itu i le toe maketiina ma le toe faalauiloaina o David Tua i totonu o Amerika, nai lo Brazil, e pei ona sa fuafua i ai muamua.
O se tulaga ua taliaina ma fiafia tele foi i ai le alo o le atunuu le afioga ia Toailetai, ona fai mai a ia, o le itu tonu lea o Amerika sa matuā iloga le tulai mai ai o lona taumafai mai tausaga ua mavae, ma o le mafuaaga foi lea o lona fiafia ma taliaina le suiga fou e pei ona toe tuuina mai.
E faapea foi se faamatalaga sa tuuina ane e le alii o Barrett le paga a Tua, sa ia ta‘ua foi lona fiafia ma talia le toe foi ane o le taaloga e faia i Amerika, aemaise lava le nofoaga e pei ona toe suia i ai.
E lei mafai ona faailoa mai le mafuaaga o le toe tuu i tua o le faamoemoe o Toailetai, ae na pau lava le tulaga ua faamaonia mai, o le aso ma le taimi, atoa ai ma le atunuu o le a faia ai, ua suia uma e pei ona ta‘ua muamua.
O loo tumau pea lava foi le tulaga o Tua, i le lona lua i le lalolagi i le faasologa o tama fusu aupito i luga, e pei ona faamauina ai, ina ua mae‘a le taaloga sa faia i Niu Sila talu ai ma le alii lauiloa o Friday, lea na faiaina ai Friday i ‘ai.
E le gata i lea, o loo faatumauina lava foi le maliliega ma le televise a Maori, mo le faasalalauina fua i luga o le ea, o le taaloga lea ua agai atu i ai le alo o le atunuu, e pei ona fuafuaina.
E ui ina sa taumafai pea le auaunaga nei ina ia toe maua sina taimi ma Tua i luga o le Radio Samoa mo se faamatalga, aemaise ai o se faamanuiaga mo lona faamoemoe, mai le tapuaiga a lona atunuu i Niu Sila nei, peitai ua lē mafai ona o le utiuti o le taimi sa tapena ai le faigamalaga.
Na pau le vaega e fia faailoa pea ia Samoa ma lana tapuaiga, mai ia Tua, o ona alofaaga e momoli e auala atu i lenei tusitusiga faapitoa.
O lona loto atoa ma lona tautua atunuu, faatasi ai ma lona taumafai mo se viiga o le Atua e ala i lana taleni ua tuuina mai, e mautinoa o lona oso tāua lea ua malaga atu nei ma ia, e pei ona talanoa mai ai i le faaiuga o le vaiaso talu ai, a o lei malaga atu.
O le ala foi lea ua faaulutalaina ai le tusitusiga i lenei vaiaso i se faaupuga faapea, ina ia mafai ona faaoo atu foi i ai i lona finagalo, lagona ma le faamoemoe o le tapuaiga a le atunuu o loo nofo tatalo ai.
O se vaega mulimuli o lana saunoa mai ina ua toe fesiligia i le tulaga o lona malosi, ae sa ia ta‘ua o loo tumau pea lona malosi sa iai, ma e faamoemoe o le faatasi atu i lana toeaina faatonu o loo faatali mai i Amerika, e mautinoa lava o le a tele foi se isi suiga o lona malosi o le a iai, atoa ai ma nisi metotia fou e sauni ai lona faamoemoe.
Ae o mea uma lava e tuu pea ma faalagolago i le Atua, auā o Ia lava e fesoasoani mai, ma ia silafia le naunautaiga ma le moemitiga o loo tauave pea. Ia manuia tele lou faamoemoe Toailetai David Tua!
