Ia Manuia Le Kerisimasi ma le Tausaga Fou Samoa

Avea ia lenei avanoa e momoli atu ai le faamalo ma le fa’afetai i le tatou Atunuu, i tupu ma e’e, faletua ma tausi, fa’apea foi susuga i fa’afeagaiga ma o latou faletua, le mamalu o Samoa aoao o loo afifio ma papaaao i Aotearoa nei.  Fa’amalo le tauivi ma le finau i matata eseese i lenei tausaga.  Fa’amalo le galulue ma le tautua aua le tausiga o aiga.  Fa’amalo le saili malo ma le saili manuia aua alo ma fanau o loo lalovaoa.

Fa’afetai mo le tapuaiga o le galuega i lenei lava tausaga. Fa’afetai mo le lagolago mai ma le faamalosiau mai i soo se taimi ma soo se avanoa.

Ou te lagona lava o lenei tausaga, ose tausaga sa feagai ai nisi o tatou aiga ma ni fa’afitauli tuga.

E toatele nisi sa vaea mai galuega i lenei tausaga. Sa iai foi nisi ua faaletonu le tamaoaiga ona ua siitia le tau o oloa ma auaunaga  a pisinisi ma matagaluega.

Ua siitia le GST, ma ua iai foi suiga o faigafaavae a le faigamalo ua aafia ai nisi o tatou aiga, ae maise suiga i aoaoga, i mataupu tau soifua maloloina, mataupu tau fale, ma mataupu tau fesoasoani i penefiti ma fesuiaiga ua iai nei lafoga totogi a le Malo.

O nisi foi o aiga ua faaletonu le tamaoaiga ona o nonoagatupe ua faia ise tulaga ua maualuga tele lava le tului e toe totogiina, ma atili ai lava ona faaletonu le faasoasoa.

E ui i lea o loo galulue punouai lava ia aiga ma tagi lava le tagata i ona lima aua le taumafaiga e tausi aiga ma ia maua e alo ma fanau se lumanai manuia, aua o latou o ta’ita’i o le lumanai.

E masani lava ona ou tautala i totonu o fonotaga a le Palemene o Niu Sila, o tupulaga lalovaoa a le Pasefika, o latou nei o le a faamoemoe iai Niu Sila i le lumanai.

E mafua ona ou faia so’o lea faamatalaga ona o lea ou te vaai i fa’amaumauga a matagaluega a le Malo o loo manino mai le si’isi’i pea i luga o fuainumera

o le autalavou Pasefika. Ua mautinoa ia te au, o leisi 20 tausaga oi lumanai, o le a sili atu le fuainumera o le autalavou Pasefika, i lo le autalavou papalagi.

Oute talitonu foi, o tupulaga talavou a le Pasefika o ni tagata ua matua faamanuiaina e le Atua, aua e le gata i le talenia i soo se matata, ae e ese foi le aulelei.

Ae e ui i lea, o tupulaga Pasefika foi, o latou nei o le a pito i sili ona feagai ma fa’afitauli o lenei olaga i Niu Sila.  E le gata i le maualuga o

le fuainumera o nisi ua falepuipui ona o ni solitulafono, o loo maualuga foi fuainumera o nisi o loo faaletonu le soifua maloloina ona o mai o le tino e pei o le suka ma le lapoa.

O nisi foi ua i’u mai aoga, ae leai ni faailoga maualuga.  O nisi foi o loo faigaluega i ni galuega e maualalo totogi.

O le mafuaaga lea e masani ai lava ona ou faapea e tatau lava ona tatou galulue faatasi ina unai o tatou alo ma fanau ina ia tumau i le aoga, ma finau ia maua ni tomai fa’apitoa, poo ni faailoga maualuga.

Ou te talitonu o le maua e tupulaga talavou o ni tomai faapitoa ma ni faailoga maualuga mai aoga maualuluga, o le a fesoasoani lelei ai mo latou e tulai e avea ma ta’ita’i i aiga, ekalesia ma upufai o malo i tausaga oi lumanai.

E le gata ia latou maua le poto ma le atamai mai aoga, ae ia latou maua foi le loto onosai i fa’afitauli o lenei olaga, maua le fa’atuatua i le Atua silisiliese, ma ia maua le tofa saili, maua foi le fa’autauta ma le fa’apalepale aua le faiga o fa’aiuga lelei mo le lumanai.

E ao foi ona tatou galulue ina ia taofi le sauaina o fanau ma le sauaina o tina ma le itupa o tamaitai i totonu o tatou aiga. Ua le’o toe talafeagai ia amioga, ua tatau ona tatou maua le malamalama.  Ua tatau ona tatou galulue ina ia maua e tatou aiga, ae maise fanau ni nofoaga saogalemu i totonu o tatou aiga, ia sefe mai latou mai sauaga.

Ia mafai foi ona latou aloese mai le avamalosi, le taumafa tapa’a ma vailaau ma fualaau fa’asaina.  O ia mea ua mautinoa lava i suesuega a le au saienisi, ua toatele ua maliliu ai.

E ui o loo silafia e le toatele le taua o upu masani a le Atunuu, faapea ia fafaga le fanau a tagata i upu, ae fafaga le fanau a manu i fua ma fuga o laau.  Ao le upu moni lava, afai e le mafaia e matua ona tatou faia ni fa’ataitaiga lelei mo tatou fanau, e toe tusi lima mai lava le tamaititi io tatou sese pe a faatonu atu ae vaai mai tamaiti e le o tutusa o tatou upu ma tatou amio ma faiga.

Ua faagata fonotaga a le Palemene mo lenei tausaga. E toe amata fonotaga i le 29 o Ianuari i le Tausaga Fou 2013.  E tapuni le matou Ofisa seia malolo le aufaigaluega mai le aso 20 o Tesema 2012 seia oo atu i le aso 14 o

Ianuari 2013.

O le tausaga fou foi o le 2013 e fai ai faigapalota mo le sailiga o sui mo pulega faaitumalo, e pei o le Supercity i Aukilani. E taua le resitara uma o le tatou Atunuu ina ia mafai ona auai i iai faigapalota.  O le tausaga fou foi e fai ai le tusigaioga (census) ma e taua le auai uma o aiga i le tusigaigoa.  O le iuga o ia tusigaigoa e faavae ai mataupu taua e avea ma

taiala i faaiuga a faigamalo i aso oi lumanai.

Ia alofa faamanuia mai le Atua i le tatou Atunuu ia maua se Kerisimasi fiafia ma le saogalemu.  Ia avea le faamanatuina o le aso na soifua ai le Alo o le Atua, e faafouina ai o tatou agaga ma taumafaiga. Ia tatou sao mai

ni faalavelave ma ia tatou aulia atu i se Tausaga Fou manuia ma saogalemu.