Gugulu lagona ile faaiuga tauvaga Tausala ole Pasefika 2017

Ole lago lelei o maimoaga ale atunuu ma e sa maimoaina le tauvaga e sailia ai se Tausala ole Pasefika ole 2017 ile 2018 i luga o fesootaiga televavave faaonapo nei, na toe suia le fiafia ile taumafaiga ale tausala a Samoa ina ua lau le faaiuga ua sola Amerika Samoa ma lana tausala le tamaitai o Matau’aina Gwendolyn Toomalatai ma le manumalo ae pito atu iai le tausala o Samoa le tamaitai o Alexandra Iakopo.

Na mafua ona gugulu lagona ole toatele ole au tapuai a Samoa e pei ona vaaia o latou manatu i fesootaiga televavave poo le social media, ona na manumalo Samoa i vaega togia e faamasino iai le tauvaga e pei o fesili ma tali le interview ma le taleni lea na manumalo ai Alexandra.

E oo lava ile faailoga faapitoa ole Miss Internet na manumalo ai le tausala o Samoa.

O imeli na tuuina atu i sui ole aumalaga a Samoa na auai i tapenaga ale tausala ole atunuu sa tausinio ile sailia ose Tausala ole Pasefika i Fiti e lei manuia se tali mai.

Ae o lagona faaalia ole toatele i luga ole social media ile facebook na faamautu ai le talitonuga e leai se tagata Samoa e lei maimoaina le tauvaga i lona vaega faaiu, e lei lagomia ma utia lagona ile faaiuga.

Ua tuua’ia e nisi le aufaamasino ole tauvaga pe aisea ua taunuu ai ise faaiuga ua lē fetaui ma vaega togia na faamasino iai le tauvaga auā o vaega ia e maua ai le tausala e manumalo.

E ui ina iai vaega ua vae manu’a ai ile tapuaiga a Samoa ile faagasologa ole tauvaga ae ua manatu le toatele e sili ona taatia ai auā e faatoa maua se faamatalaga tonu pe a taunuu le aumalaga sa agai i Fiti e tapena le tausala ole atunuu.

Ole tausala o Amerika Samoa ua manumalo ile pale ole tausala ole Pasefika ua na toe se’i le manumalo mai isi tausala sa tausinio ile tuanai ole 15 tausaga o taumafai pea le teritori ae e lei fiki se laki.

O lea la ua foi le aumalaga a Amerika Samoa sa tapenaina le latou tausala ua manumalo ma le loto ua fiafia ae talosia e lei togafalea le faaiuga a faamasino.

E fā faailoga na manumalo ai Alexandra Iakopo ole Miss Internet, Miss Personality, ma le Best Talent and Interview.

Ole faatulagaina o tausala na auai ma faailoga na manumalo ai:

SPECIAL AWARDS

Photogenic: Miss Am. Samoa

Tourism: Miss Am. Samoa

Best Traditional Wear: Miss Am. Samoa

Personality: Miss Samoa

Internet: Miss Samoa

Best Talent: Miss Samoa

Best Interview: Miss Samoa

Best Sarong: Miss PNG

Runners Up

4th Runner up: Miss Rapanui

3rd Runner up: Miss Cook Islands

2nd Runner up: Miss Fiji

1st Runner up: Miss Samoa

Ole atunuu o Tonga ole a faia ai le Tauvaga mo le Tausala o Motu ole Pasefika 2018.

O tamaitai tauva nei:

Miss American Samoa – Matauaina Gwendolyn Toomalatai

Miss Cook Islands – Enerstina Pokuia Bonsu-Maro

Miss Fiji – Hally Qaqa

Miss Nauru – Tansy Angelique Itsimaera.

Miss Papua New Guinea – Niawali Anastacia Twai

Miss Miss Samoa – Alexandra Iakopo

Miss Solomon Islands – Emily Chan

Miss Tonga – Ophelia Kitiliti Kava

Miss Rapanui – Tiare Pakarati