I le sauni atu o ‘au mo le isi vae o le taitoafitu talu mai Sini i le faaiuga o le vaiaso, ua amata siitia ai foi le mataalia o laufali ma tafu‘a i le mataituina o numera o tama taaalo i luga o le malae a o faagasolo le taaloga.
Ua amata lenei faamanatu tāua talu ai le taaloga mulimuli o le Pulu lea sa saili ai e Niu Sila ma Ausetalia poo ai e sili i la latou pulu ma sauni ai i le aso lona lua mo taaloga o le pa‘ū ma nofo I lea taaloga e ta le taimi faaiu o sili Ausetalia 17-10 ae o se pasipasiga a Ausetalia lea na mamulu atu ai Tim Mikkelson ma pasi mai loa i totonu ia Ardie Savea mo lana sikoa i lalo o le pou ma tutusa ai le taaloga 17-17.
Ae peitai i le mātau a le aumaimoa ma televise, e toavalu sui o le Olopeleki na i luga o le malae i le taimi lea na sikoa ai Savea ma tutusa loa ua uma le taimi.
O se faaseā lea na tuuina atu e le pulega a Ausetalia ma o loo sailiili nei pe faasala Niu Sila i Sini poo le isi taamilosaga i Amerika.
O se manatu lautele o isi ‘au e tatau na toese ‘ai o Niu Sila pe a faamaonia le soli o le tulafono a o sili ai o Ausetalia i le faaiuga o le taaloga. O le alii faiaoga a le Two Blues i Sini nei ia Michael Bell ua manatu e tatau na mamafa se sala a Niu Sila ina ia aua ai le toe tupu.
E ui i lea faaletonu ae na matuā maofa le lalolagi o le lakapi i le tumu ma le lagolagoina lelei e Sini o le tauvaga muamua pe a fua atu i le gaogao o Ueligitone.
O nisi foi e lagolagoina le taitoafitu a Ausetalia e manatu e leai se avanoa o Niu Sila i lea taaloga pe ana taalo Quade Cooper lea na malolo e lei taaalo. Ae na saunoa Sonny Bill i luga o le leitio a 2GB ma Alan Jones, “E faafetai lava i le pulega ua lē taalo Quade Cooper auā ua tele ai so matou avanoa.”
