“E lē mafai ona ou tali atu ona ua na o le alii Komesina e maua ai le atoaga o tou fesili i le lipoti a le Komesina o Sulufaiga”… Su‘a Tiumalu Muliaga
Ua uma le faaiuga o le vaiaso e lei toe maua mai se faamatalaga i le failautusi a le Komesina o Leoleo pe aisea ua lē taliina ai fesili a tusitala na meli atu i ai, a o lumanai le feiloaiga masani ma le Sooupu o le Matagaluega e faia i vaiaso taitasi.
Ua na o se tasi o auala o faasalalauga na ave i ai se finagalo o le Komesina ina ua faasalalau mai e se nusipepa le lipoti atoa a le Komesina o Sulufaiga i le osofaiga a leoleo na faia i le maketi i Fugalei i le masina o Aukuso o le tausaga ua mavae, i se tasi o poloka faatau.
O le suesuega a le Komesina o Sulufaiga i le faaseā na ave i ai e le susuga Suitupe ma lona toalua e ana le poloka faatau na osofai e leoleo sa faaaupegaina i laau malosi.
O le lomiga talu ai a le tatou nsuipepa sa lomia ai se lipoti e tusa o le mea na tupu ma le taunuuga o suesuega a le Komesina o Sulufaiga.
O le mafuaaga lea o le tulituliloa o le alii Komesina le afioga Fuiavailili Egon Keil, i sona finagalo faaalia e tusa o le taunuuga o le suesuega.
Ua fai mai le lipoti e itiiti se silafia o le Komesina i le tulafono. Tasi lea o vaega sili ona ‘anoa o le lipoti sa fia maua ai sona finagalo. E faapena foi i le fautuaga e toe iloilo le vaega o le tulafono a leoleo o loo fesiligia ai se ioega a le Minisita o Leoleo i le faaaupegaina o Malu o le Malo.
O le isi itu sa fia maua ai se finagalo o Fuivaialili pe moni le lipoti a le Komesina o Sulufaiga ua foliga mai o sikaili faaleoleo i Amerika ua faatino e leoleo i Samoa o se atunuu e laitiiti ae o loo iai lana aganuu e soalaupule ai ni mataupu e aunoa ma le aapa o leoleo e faaaogā laau malosi poo aupega.
Na fesiligia le Sooupu o le matagaluega o leoleo i sona lava lagona o se tasi o leoleo sinia ua leva tausaga o galue, e tusa o vaega ua faailoa e le Komesina o Sulufaiga i le lipoti. “Ou te faamalulu atu ou te lei vaai pe faitau i se lipoti, ae na o le Komesina lava e maua atu ai se faamatalaga”, o le saunoaga mai lea le Sooupu.
O le tagata na logoina le Komesina o Leoleo poo le informer e tusa o le faamata‘u na faia e se tagata i le Minisita o Leoleo ma le Komesina, peitai e lē moni lea faamatalaga, ua faia le fautuaga a le Komesina o Sulufaiga e faia se moliaga i le faia o ni tala tau faasese.
O le mafuaaga lea na osofai ai e leoleo le poloka faatau a Suitupe ma lona toalua peitai ua fai mai le lipoti i le suesuega, e solitulafono le gaioiga a leoleo na pueina ai Suitupe aemaise e leai se tusi faataga poo se Search Warrant na latou tauaveina i le taimi na faia ai le latou gaioiga.
