E miliona se vaega tupe ua fuafua i lalo o le tala autū o le tupe a le Malo Tutoatasi o Samoa mo le isi tausaga faaletupe o sosoo ai nei, o le a tuuina atu i le Pulega o Uafu le Samoa Ports Authority e faagaioia ai ana galuega.
O le talitonuga maumaututu o le Itu Agai ua gau le pulega o uafu, o le mafuaaga lea o le aapa mai i le Malo mo se fesoasoani.
“O faalapotopotoga ia a le Malo e faagaioia faapisinisi ma o aiaiga o le tulafono sa faatūina ai, o le aumai o tupe i le Malo ae lē o le Malo e tuuina atu i ai ni seleni”, saunoa ai le taitai o le Itu Agai. O le uafu i Satitoa Aleipata ua faaalia e le Itu Agai ua faaletonu nisi o vaega. Sa molimauina i se asiasiga a se komiti faapalemene lea tulaga. O malaga a le vaa laupasese o le Malo le Lady Naomi sa ave i ai, e lei umi ae toe foi mai i le uafu tele i Apia ona ua gau ai tupe a le faalapotopotoga o vaa a Samoa le Samoa Shipping Corporation e pei ona molimau mai le taitai o le Itu Agai.
O le uafu i Salelologa e lei toe afea e se vaa la‘uoloa poo se meli laupasese e pei ona iai se fuafuaga a le Malo ina ua toe faaleleia lea uafu. E oo mai i le taimi nei e leai se faamatalaga mai le pulega o uafu pe aisea ua lē toe pipii ai ni vaa tetele i le uafu i Salelologa. I le uafu i Satitoa o loo iai pea le vaega na fausia e toso ai vaa mo le toe faaleleia, ma ua na o vaa laiti e mafai ona toso ai, ae lē mafai ona toso ai vaa lapopoa o le Malo e pei o vaa laupasese tetele o loo feoai i le va o Upolu ma Savaii faapea ma Tutuila. Tasi lea o atugaluga o le Itu Agai ona e lē o mafai ona faatino uma galuega mo le faaleleia o vaa i le nofoaga e toso ai vaa i Satitoa le slipway.
Sa iai se tasi o fuafuaga a le Malo e faaaogā le uafu i Satitoa e avea ma se tasi o nofoaga e tuta i ai le vaa o le MV Lady Filifilia pe a alu ni ana malaga e faatafao ai tagata tulisi.
Peitai talu lava ona faalauiloa lea taumafaiga mo ni tulisi ma tagata e fia tafafao e maimoa ia Upolu ma Savaii e lei iloga ona tino mai i se tulaga lelei lea atinae.
O le taimi nei ua na o faiga faapisinisi o loo tafafao ai tagata i luga o lea vaa ae totogi tupe ma taamilo ai lava le vaa i le uafu i Apia.
E ta‘ua lea taumafaiga faapisinisi a le faalapotopotoga o vaa a Samoa o le Rock the Boat. Toatele tupulaga e fiafia e tafafao ma inu ava malosi ai i luga o lea vaa o le malo i faaiuga o vaiaso, ma o loo tau maua ai nisi seleni a le faalapotopotoga.
