Ole pese lauiloa a Seiuli Pesa Ilimaleota pe a i‘u se faafiafiaga, “Ua i‘u le po, ua uma le siva, ile pese mulimuli, a‘o e fusi mau ita. Musumusu mai, i lo‘u taliga, Fesili mai pe ua fai o so‘u aiga.”
Ia o aga lava na ole po ile ova ole fiafia o tagata uma ile vaai male maitau ia i latou sa faatumulia ai le Logan Community Hall i Logan Central ile po ole Aso Toonai ua mavae.
A mālie se pese mase faaili ini poula ma ni faafiafiaga, e tele ina nanau loto ole au eva ma tauau ina lē fia o ai ile fale, e fiu nai latou aiga e tau tata‘i o la e faatali mai tamaiti, ae pei ua tau filogia nai o latou lagona ma liua atoa nai o latou mafaufauga pe a oo ina oooo ile loloto le suamalie ole eva.
Ole nofo tatali ole pitonuu nei e fia maimoa ile tamaitai pese lauiloa o Cindy e faafiafia ile faaaliga o laei ale faletua ia Penina le Gardenia Hinano Boutique. Sa matuai faamalieina le maimoa male silasila ale aofia i aga male siufofoga ole tamaitai pese faapea le faaili ale Island Eagle, ae sili ai le matagofie ole felanulanuai olaei na maimoaina i lea afiafi.
Ole itupa o tamaitai ua tele ina solifesui ile tele o mamanu eseese ua fetuleni mai i lenei talutalufou ma e momoli ai le agaga faafetai e lē gata ole faletua ia Penina Tuiavii, le faletua ia Susana Ah Wong ae faapea le tele o alo o Samoa ua iai tomai faapitoa ile mamanuina male su‘iina o soo se laei ile tele o ituaiga sikaili e fetaui male finagalo ose tamaitai poo se alii foi.
E faateleina le lalelei ose tamaitai Samoa ae laei ise puletasi poo se ofu e mamanu ini mamanu Samoa e pei ona molimauina i nei vaitaimi le anoanoai o ituaiga mamanu ua oo iai le tomai o tama fanau a Samoa e ala ile meaalofa ua faasoa ele Atua i tagata suisui faapea foi le lolomi.
Na nofoia le auvalaaulia ona amataina lea ise tatalo puupuu ele susuga ile faafeagaiga a Rev Perelini Tauilo, ma faafeiloai ai ele Fofoga ole po, le afioga ia Toleafoa Ian Asiata le mamalu ole atunuu sa faatasi atu.
E felanulanuai ma aga eseese vaega uma ole po ile matagofie, toafilemu mea uma, aga faatamalii ma faatausala tagata uma ae sili ai na faafetaia, e leai mase vevesi auā na lelei lona faafoeina.
Ole ‘afa ole 8 na faalauiloa ai ele faletua ia Penina e autu iai le po, lona silafia ile su‘i male mamanuina o laei, ae ole tulaga maualuga o lana tautua i Samoa, ona faagasolo ai lea ole faaaliga o laei faa-Samoa matagofie lea sa tele ina laeiina e nisi o alo ma fanau Samoa ona faagasolo ai loa lea ole faaaliga o laei matagofie sa laeiina e alo ma fanau o Samoa sa filifilia faapitoa mole faamoemoe.
Sa faapea ona auai mai le faletua ia Susana Ah Wong mai Samoa e lagolago le faamoemoe ole Gardenia Hinano Boutique. E toatele naua i latou sa auai e lē gata o susuga i faafeagaiga, taitai o mafutaga, aufaipisinisi, ae faapea foi le aumatutua male tupulaga talavou.
Ole susuga ile faafeagaiga ia Rev Perelini male faletua ia Tili Tauilo faapea le nofoaalo sa taulamua i lenei faamoemoe.
O le tele o la’ei matagofie a le faletua ia Penina faapea le faletua ia Susana Ah Wong oloo faatauina lea ile tautua ale faletua ia Wendy Apu ma le afioga ile aloalii ia Galumalemana Harry Timoteo male Enchiro Laei i Slacks Creek.
O ni tamalii foi ua iloga ile tautuaina o Samoa i Kuiniselani.
