Galulue fomai Amerika e fesoasoani mo tagata Samoa e aunoa ma se totogi

 Le Susuga Nuuausala, o loo gafa ma le tapenaina o tagata o le tatou atunuu i le fesoasoani faafomai maua fua mai Amerika
Le Susuga Nuuausala, o loo gafa ma le tapenaina o tagata o le tatou atunuu i le fesoasoani faafomai maua fua mai Amerika

O le galuega lea o loo faia nei i Samoa a fomai faapitoa mai Amerika e le o se mea fou.  O tausaga uma lava e taunuu ai le aumalaga a le Susuga Mulitauaopele ma fomai faapitoa, e ofo alofa mai la latou fesoasoani, e le gata o le tomai faafomai ae o vailaau ma togafitiga.

O le vaiaso talu ai na malaga atu ai mo aso e lua i Savaii, ma sa faafoe le fesoasoani i Salelologa. E silia i le 300 alii ma tamaitai, o tamaiti, tamā ma tina na autovaa ane iai, e fia maua se fesoasoani o se tautua na faia fua.

Ma na molimauina e le Susuga Nuuausala o loo talimalo ai i le aumalaga lenei, le tele o se sao o nei papalagi, ae o le aiga Samoa na uluai aumaia lenei fesoasoani le susuga a Mulitauaopele ma lona faletua.

Na talanoa ai Mulitauaopele o le 1996 na malaga mai ai ma lona aiga, ma latou maitauina le manaomia o le fesoasoani i soo se itu o le soifuaga i Samoa nei. Ae oo ane i le tausaga e 1999 ua amata ona faasolo le latou galuega seia oo mai i le asō.

Ua silia ma le 90 afe tagata Samoa, e aofia ai Amerika Samoa ma Samoa tutoatasi, ua mafai ona oo atu iai le galuega alofa ma manuia ai i togafitiga faapea fesoasoani eseese na tuuina atu iai.

O le tausaga lenei, ua malaga faatasi mai le fomai mai Amerika, e tusa ma le 20, ma le tusa o le 10 o le vaega faapitoa mai Amerika Samoa e fesoasoani, o nei tagata uma o loo galulue lava latou e aunoa ma se totogi.

Peitai i le molimau ai a le Susuga i le faafeagaiga ia Nuuausala, o le tele lava o faafitauli tau le soifua maloloina o loo aafia ai o tatou tagata, o le vaega e aafia i le toto maualuga ma le ma’i suka. Peitai na faateia foi ia i le asiasiga o lenei tausaga, ae maua mai ai ma tamaiti o loo aafia i le tino paee.

E afua le tino faa’ause o fanau, o le faaletonu o meaai, e pei o le suavai ma le tausiga o aso uma. O le tulaga masani lava, a iai tamaiti ua ogaoga tulaga ua iai, ona faatonu lea e vaai se fomai ma fautuaina foi le faia iai o se fuafuaga vave. Pei ona iai se tasi o ma’i na oo atu mo se fesoasoani.

O isi tulaga ua maitauina foi, o le tulaga tau i le matamuli o le itupa o alii, poo tane foi o loo aafia i ma’i o tane. E foliga mai e le gata ina faigata ona malaga i le falemai ona o le faaletonu o tulaga tau tupe, ona nofonofo ai lava lea o le alii ma lona faaletonu i le fale.

O nisi e maua ane, ua tauau ina ui le ma’i e pei ona talanoa ai le Susuga Nuuausala, o le isi lea aoga o le latou malaga poo galuega fesoasoani nei. Aua o le isi tamā, e mafai ma faigofie ona tatala ane ona lagona i ituaiga o fomai faapea, poo latou foi.

Ua maitauina foi, le tele o se eseesega o le lolofi ane o tagata i Savaii e vaai le fomai ma le taunuu mai i Upolu nei, ona ua faaleai ni tagata e o ane i le falesa o le Voice of Christ i Vaitele.

O loo masalomia, o le tele o tagata e le o silafia le fesoasoani fua o loo maua nei, ma e tasi lava le aso ua atofa mo Upolu. Na talanoa ai le alii taitai malaga mai Amerika, i le naunau lava e faaauau ai pea lenei auaunaga, e le gata o le omai ma aumai togafitiga, ae o fualaau, kulimi, matatioata, o masini e saili ai le suka ma le toto maualuga.

Ma ua faatoa iloa ai e le isi toatele o tatou tagata, le tulaga o iai o latou suka ma o latou toto. Ua maitauina e pei ona talanoa Nuuausala, o le lē gafatia e isi tagata ona malaga atu i le falemai e mafua ai ona nofonofo ai lava i le fale ma le ma’i.

O le taimi nei, e $10 le totogi e vaai ai le fomai i le falemai.

E oo lava i le ma’i e fai fusiga, o taimi uma lava e fusi ai le manu’a e sefulu tala. O le isi, e tasi lava le fusiga ma tuutuu ai lava i le faatamala talu ai e le gafatia le tau o le pepa e vaai ai le fomai.