O le faatāuaina o tupulaga talavou, e galulue faatasi ai mātua, aiga ma Ekalesia. I atunuu o tupe ma le tele o ‘oa ma le tamaoaiga, ua lē ‘asa i se aiga le maimau ma le mamulu atu o alo ma fanau talavou i taaga ma olaga faapapalagi e leai se ava ma se faaaloalo, aemaise le tagofia o le ‘ava malosi ma fualaau faasāina. E leai se pa puipui o mafai ona taofiofi maia le tupulaga mai olaga nei, e oo foi i le tulafono e leai sona malosiaga mautu ona o le malosi o le tupe ma le ola fai uo.
Ae o se tasi o anavatau ua faasavaliina nei e se tasi o Ekalesia Samoa ma se Ekalesia Fiti, o le faataunuuina lea o polokalame mo tupulaga talavou, e aofia ai le faia o sauniga lotu mo tupulaga (youth services) i le gagana ma le auala e malamalama ai le autalavou, le faatapulaaina na o ni lavalava lotu, o pesega foi e faaaogā lava na o pese lotu faaonopo nei, ma le a‘oa‘oina o le Tusi Paia i le auala e malamalama ai.
O loo faagasolo foi mafutaga e fai lava e tupulaga talavou, ae gasese e mātua ma faifeau meaai, e mafai foi ona valaaulia soo se uo e tusa pe lelei pe leaga. O se tasi o fuafuaga fai a Ekalesia, o le faia o soo ma isi autalavou e faalautele ai fesoasoani maua, faatasi ai ma nisi o a‘oa‘oga (training) o le a faia i le tāua o aiga aemaise o fualaau faasāina.
O le tatalo a Ekalesia, ia aogā mo tupulaga talavou i le lotoifale ma faasolo atu ai i fafo.
