Na faatumulia le hall poo le nofoaga a le ekalesia Katoliko i Maleola i Magele, i se tuufaatasiga mo le faalauiloaina o se tasi o polokalame a le Malo, ae o lea aso sa faapitoa lava mo tagata Pasefika.
O le tamaitai Minisita lagolago a le Matagaluega o Auaunaga lautele mo Atinae manuia (Associate for Social Development) Hon Tariana Turia, sa auai e fai ma sui o le malo.
O ia foi lea o loo ogatotonu i le taumafaiga o lea fuafuaga fou mo tagatanuu o atunuu e fitu o le Paseifka, e aofia ai Samoa, Cook Islands, Fiti, Tokelau, Niue, Tonga ma Tuvalu.
O le polokalame ua faaigoaina o le Vaka Kaiga Tapu, Pacific Conceptual Framework, o se fuafuaga e faatatau ma taulai mo le amanaia ai ma toe faamanatu i tagata lautele le tatau ona faaitiitia le tulaga o soo se ituaiga sauaga i totonu o le faapotopotoga o tagata lautele faapea le siosiomaga o aiga ma tagata Pasefika.
O le pepa na faavae ai le tautalaga a le tamaitai Minista lagolago, o loo ta‘ua ai e faapea o aganuu ma tu a tagata o atunuu uma, o le ki lea e matala ai ma faailoa auala eseese e faafoeina ma suia manatu o tagata, ma taitaina ai le faatinoina o vaega anagata i totonu o tagata taitoatasi, ma avea lea ma amataga e ono suia ai ma le lalolagi atoa.
O tu foi ma aganuu a atunuu taitasi o le Pasefika, e matua tele le talitonuga, ma le manatu, e tatau ona faaaoga e fofo ma foia ai le tele o ituaiga sauaga o loo tutupu pea ma aliae mai i le siosiomaga o tagata lautele.
O le sini foi lea ma le autu ua faavae ai lenei polokalame ma se fuafuaga a le tamaitai Minisita o le Matgaluega, ma ua tuu avanoa ai i Taitai ma Faufautua o le Pasefika ma atunuu o loo iai, latou te tilivaina ma faalauiloa, atoa ai ma le faatinoina ina ia mautinoa, e tele sona aoga ma sona taua agai i le faatoilaloina o le anoano o le mau faafitauli e mafua ai sauaga.
O le afioaga ia Faamatuainu Tino Pereira, o ia lea o le Taitaifono o le vaega Faufautua a le Pasefika e pei ona faatulagaina nei, ma o le a galulue faatasi ma tagatanuu o atunuu eseese, aemaise o fesootaiga uma i le va ma le Matagaluega ma le Malo.
Ina ia tausisia ma ia agai i luma galuega a le polokalame fou, ma ia faafeiloaia le ola ma le soifua manuia o tagata uma, ae le o le faatino pea ma ola i sauaga, e ao ona galulue faatasi vaega uma i matafaioi ma matata taitasi.
O le tamaitai Minisita lagolago lava, Hon Tariana Turia, sa saunoa e faamalamalama le sini ma le autu o le polokalame fou e pei ona faalauiloaina.
O le tele o vaega o lana saunoaga na faaliliuina ma o loo tusia i lenei tusitusiga. Ae o le susuga ia Laauli Michael Jones ma lona faletua ia Maliena sa tofu i laua ma avanoa taua e saunoa faapitoa ai i le faamoemoe o le aso.
O le saunoaga a Laauli na ia toe faatepa ai le mamalu o tagata Pasefika ma i latou na auai i lea aso, i le taua tele o faiga faasamoa e faaaogaina ai ana tu ma ana aganuu i totonu o aiga.
O le ala manuia lea o soo se tama ma soo se teine Samoa, ona o aoaoga ma le faatulagaina o le taua o alo ma fanau ma soo se tasi lava i totonu o aiga.
Saunoa Laauli ma ta‘ua ai lona lava olaga i totonu o lona aiga, e fai ma faataitaiga ma faamaoniga o lana mau ma lona finagalo sa faaalia.
E le mafai e se tasi ona aveesea le taua o tu ma aga sa faavae mai ai lona tagata e lona tina o se tina Samoa, e matua naunau ma lototele i lana aoaoga ma lona atunuu.
Saunoa foi Laauli e le gata i le lotoifale faaleaiga i matua ma fanau, ae faapea foi i le lio o aiga potopoto, ma aiga lautele. E ese foi le taua ma le loloto o aoaoga e maua mai ai.
O ia vaega taitasi uma, e taulai ma auga lava i le sini ma le faamoemoe e tasi, o le puipuia ma le saogalemu mai sauaga ma faafitauli e pei ona mafua ai le fuafuaga a le Matagaluega ma le Malo, e pei ona faataatia faapitoa mo tagata Pasefika.
E oo foi i le molimau a lona faletua ia Maliena, sa taulai foi lana saunoaga autu, ma faataua pea le aoaoga sa faia e matua Samoa i totonu o aiga, ae sa faamamafa foi i lona olaga i totonu o lona lava aiga i ona matua, uso ma tuagane.
O le autu lava o saunoaga faapitoa o le taumafai lea e faamaonia ma toe faatepa le Pasefika i le taua o ana tu ma ana aganuu, ina ia mautinoa o loo faaaogaina pea e fesoasoani ma avea pea ma taiala o faiga ma suiga o le soifuaga e aunoa ma faiga saua e afaina ai alo ma fanau i lenei vaitaimi.
Sui o le Pasefika sa tuufaatasia le Polokalame (Pacific Conceptual Framework):
Samoa: Maiava Carmel Peteru – O le faletua foi lea sa ia tusia ma tuufaatasia le igoa ua faaigoaina ai lenei polokalame. O ia foi sa tusia ma faamaumauina vaega ua tusia e fai ma taiala o le polokalame.
Cook Islands: Jean Mitaera – O le sui foi lea o lea atunuum sa auai ma sa ia tusia foi le vaega mai lona atunuu ua faamauina ma ua faavaeina ai le polokalame lava lenei a le Malo.
Fiti: Sai Lealea – O se alii mai Fiti, o le sui o le faalapotopotoga fou e pei ona faavaeina. O ia foi na tusia le sao o Fiti e ala i faamatalaga ma vaega tupito a lea atunuu, ua avea ma aoaoga aoga mo le polokalame.
Tonga: Aminiasi Ikamafana Tameifuna – O le sui o le Malo o Tonga, o ia foi o se alii Faifeau, ma o lona sao taua na e ala i le tusia ma faamauina o le soifuaga i totonu o lona atunuu. O le faaupuga a Tonga e faapea, Fofola le Fala.
O lona uiga o le talanoa ma fefaasoaai o tagata taitoatasi i totonu o aiga taitasi. O lea faiga o loo faatumauina pea le talitonuga o tagata Tonga, e taitaina ai ona tagata.
Niue: Manogi Tavelia – O le sui mai le atunuu o Niue, sa ia tusia ma faamauina faamatalaga uma o loo fesoasoani i le mau a le Polokalame, mo le faaleleia o aiga ma le sini e pei ona taulai i ai le polokalame, ia faaitiitia sauaga i totonu o aiga ma faalapotopotoga a le Pasefika.
Tokelau: Salapina Everdina Fuli – O ia foi o se sui faapitoa o Tokelau, o loo auai ma ia tusia ma tuufaatasia uma faamatalaga e uiga i le auga ma le autu o le polokalame.
Tuvalu: Manuila Tauasi – O le sui filifilia na ia faamauina ma auai foi i le tusia ma le aofaiga o faamalataga eseese mo le fausia o le faavae ma le auivi o le fuafuaga e pei ona faalauiloaina faalauaitele.
O sui uma mai atunuu e fitu o le Pasefika, o i latou foi ia o le a nafa ma le faatonutonuina ma le vaaia pea o le agai i luma o fuafuaga a le polokalame mo tagata Pasefika.
O malo faaaloalogia sa auai ma molimauina lea foi aso tāua, o le Afioga i le Konesula o le Malo o Samoa, le susuga ia Faolotoi Reupena Pogi.
O sui o le Palemene o Niu Sila, le tofa Su‘a William Sio, le afioga ia Leaufaamulia Asenati Taylor, ma le susuga ia Alfred Ngaro.
