“Samoa e, afai e taula’i pea la tatou vaai i nā o ni itu faalēlelei ma tatou su’esu’e masei, poo a ni uiga vaivai ma le toilalo, oute tatalo atu i le agaga maualalo, aumaia le filemu o le Atua tatou te galulue faatasi ai, ina ia avea Samoa o se faigamalo ma se atunuu e lelei mo ona tagata, ma faamaoni lona faavaeina i le Atua Silisili ese, o le puna o manuia ma mea lelei uma”.
Ua logo faatutuila Samoa i le malelega faamanuia o le atoaga o le 56 tausaga o le Tutoatasi o Samoa i lenei tausaga 2018. O le uluai malelega mai le afioga i le Tui Aana talu ona filifilia e avea ma Ao o le Malo le afioga Tuimalealiifano Vaaleto’a Sualauvi II.
O se malelega ua toe faatepa ai le atunuu i le tāua o le galulue faatasi, toe faatepa i le tāua o le sao o mātua ma tuaa na asaina le gasū o le taeao i le fia maua o se Malo e pulea lava e tagata o Samoa. Na faafetai ai foi le Ao o le Malo i le Komesina ma le Matagaluega o Leoleo i le galuega na vave ona fofo ai vesiga sa aafia ai afioaga o Salelologa ma Salelavalu i Savaii i le amataga o le vaiaso ua mavae a’o lumanai le faailogaina o le Tutoatasi i le Aso Faraile ua mavae atu nei.
“O le silasila mamao a o tatou tuaa ma matua, ma a latou tatalo, ma lo latou talitonuga, o le a lava saunia i tatou, i le faaletino, faalemafaufau ma le faaleagaga, tatou te fa’aauau ai galuega lelei sa latou amata mea ai, ina ia siitia lo tatou atunuu i le malosi e sili atu; auā o lo tatou faatuatuaga faakerisiano, e maua lo tatou malosi, ma le atamai, ma le tamaoaiga, ma le pule, mai lo tatou alii o Iesu Keriso, tatou te faafoeina ai, ma faamamaluina ai lo tatou malō, ma manuia ai Samoa.
Auā o le Atua ua faavae ai lo tatou malo o Samoa, o le Atua e ana vavega o loo saogalemu ai si o tatou atunuu mai le tele o mala faalenatura ma faalavelave matuiā o loo aafia ai le lalolagi i nei ona po”, o se vaega o le malelega a lana Afioga i le Ao o le Malo. Na momoli foi le faafetai a lana Afioga i le Palemia ma le faigamalo ona o galuega lelei uma mo le manuia o tagata.
“E momoli le faafetai tele i lau afioga i le Alii Palemia ma Minisita uma o le Kapeneta, ma lau afioga i le Fofoga Fetalai faapea sui mamalu uma o le Palemene o Samoa, mo lo outou tautiga, o le onosai ma le alofa ia manuia Samoa. E momoli atu foi le faamalo i le afioga i le Faamasino Sili ma le vasega o faamasinoga auā foi le tauaveina o la outou pitolaau.
Ou te fia faafetaia foi le atunuu atoa i lo outou sao tāua i le atinaeina atoa ai ma le puipuiga o si o tatou atunuu ina ia saogalemu. E le faagaloina foi a tatou paaga mai fafo mo lā outou lagolagosua faifaipea i le atinaeina o Samoa”.
“Ae ou te valuvalusia pea aa o le fau, e avatu pea se faamanatu. A oo ina o tatou taumamao ma le Atua o loo faavae ai lo tatou Malo, ona fetaiai lea o tatou ma faafitauli, ma afaina ai lo tatou nofo filemu.
Ou te faatepa lo tatou atunuu i le feeseeseaiga na tulai mai nei i le amataga o lenei vaiaso, i le va o tupulaga o ni afioaga e lua.
Ou te matua’i faafetaia ai auauna a le Atua ma le pulega mamalu a Alii ma Faipule o nei afioaga e lua, faapea le Malo, ma le afioga i le alii komesina o Leoleo ma le mamalu o le matagaluega o Leoleo, ua vave ai ona foia lenei feeseeseaiga, ma toe maua ai le nofo lelei. O le faamaoniga lea, a galulue faatasi lo tatou Malo, ma a tatou pulega faalenuu, ma auauna a le Atua, e manuia ma filemu Samoa”.
O le Pelesetene o le Malo o Fiti, Pelesetene o le Malo o Nauru, o le Ulu o Tokelau, ma le Kovana Sili o Amerika Samoa ma o latou faletua sa avea o Malo faaaloalogia i le faamanatuina o le Tutoatasi o lenei tausaga.
