Galulue faatasi faiaoga ma mātua o Aoga Amata atiae taaloga mo fanauiti

Na maualuga ma matagofie le aso taalo a fanau laiti i le Aso Faraile ua mavae, aso 13 o Mati, ona o le lagolago a mātua i galuega a faiaoga o loo nafa ma nai fanau i Aoga Amata. O le malae o le Ekalesia Aso Fitu i Magele na faataunuuina ai lea faamoemoe, ma sa vaaia ai le faatumulia o mātua i le agai atu e molimau le aso ua faapitoa mo taaloga a fanau laiti, lea e i lalo ifo o le 5 tausaga le matutua.

Na amata mea lava i le taualaga faafetai i le Atua, lea na ositaulaga ai le susuga i le faafeagaiga ia Sue Malo o le Ekalesia Aso Fitu Samoa Tutoatasi i Magele. E 11 aoga o loo resitala i lenei faamoemoe, ae na o le 7 na mafai ona paau atu ona sa lē maua ni avanoa mo isi aoga. O aoga sa auai o le Fetu Taiala Aoga Amata, Seugagogo Aoga Amata, Agape Aoga Amata, Fetu i Sasae Aoga Amata, Taeaofou i Puaseisei Aoga Amata, St Peter Chanel Aoga Amata ma Papatoetoe Aoga Amata.

E 8 taaloga na tauva i ai le fanau, tuuga tamo‘e, tufaga polo ma toe ao, maulu i le hula hoop, oso i polo osooso, togi i atigifagu, tuuga taga, moliga fu‘a ma le tosoga maea. E lei tuumamaina e fanau lo latou aso taalo auā foi o lea ua masii le fala siigata i le tapuaiga a mātua, aemaise o nisi o aiga sa auai.

O le tāua o lea aso, e lē gata ina maua le faamalositino mo fanau, faiaoga ma mātua, ae o le avanoa foi ua maua e felosipi ai aoga taitasi o loo i totonu o Aoga Amata. E lē gata i lea o le maua o le ‘ata i le mālie o uiga o tamaiti, ae faapea foi le vaovaogata atu o le au maimoa i le valaau i totonu e faamalosi i fanau.

O le maualuga o le aso ma le titi faitama o mātua, na iu ai lava ina maua le avanoa o mātua i totonu o le malae i le taaloga o le moulu i le mama, lea e mae‘a ane ua tetelē mama a tamaiti aoga i le lapopoa o latou mātua.

O le taualuga o nei taaloga o le suega siamupini o le tosoga maea lea sa toso ai le Fetu Taiala Aoga Amata ma Papaoetoe Aoga Amata. Sa fai si umi o fetosoai le maea e nei fanauiti ma iu ai lava ina malo le Papatoetoe Aoga Amata.

O le iuga o nei taaloga na sola ai Seugagogo Aoga Amata mai Otahuhu ma le talita o le siamupini o lenei tausaga; tulaga 2 o St Peters Chanel mai Wiri; ma le tulaga 3 o le Fetu Taiala Aoga Amata mai Magele, ma o le aoga foi lea sa mauaina le faailoga o le togiga taalo lea sa piki mai e le Bader Drive Health Care auā o latou sa faamasinoina le aoga e manaia le togiga. Ae o le Papatoetoe Aoga Amata na mauaina le faailoga o mātua ma le au tapuai sa auai. O le tasi foi lea fesoasoani malosi i taaloga a le fanau i lea aso o le faatasi atu i ai o le Bader Drive Health Care mo le faalauiloaina atili o le ma‘i o le Fiva Rumatika aemaise ai foi le aufaigaluega a le South Seas Health Care.

O le tuufaatasiga o lenei faamoemoe sa galulue faatasi uma ai Aoga Amata e fitu ae taulamua ai lava le komiti filifilia, e pei ona iai le peresetene ia Moria Etuale, taitaifono ia Noama Timoteo, failautusi ia Faauiga Keresome ma le teutupe o Letelemalanuola Moe-Penn. Ma o tausaga taitasi uma lava o loo faagasolo ai lenei polokalame.

Seugagogo Aoga Amata.(Siamupini 2015)