Ua faagasolo se galuega ua tutufaatasi ai ofisa faasalalau a le Leitio 2AP atoa ai le TVOne (Samoa Quality Broadcasting) atoa ai ma le Matagaluega o Punaoa Faanatura ma le Siosiomaga ina ia faaleleia atili faasalalauga i taimi o faalavelave tetele i le atunuu.
O se galuega lenei ua mautinoa lava le faitioina i tausaga ua tea i le tulai mai ai o faalavelave tetele i le atunuu i afā fulifao atoa ai ma galulolo, ae o lea ua agai ofisa nei e tolu ina ia mafai ai ona tuuitiitia soifua maumau i taimi o nei puapuaga.
O se tamaitai mai i Niu Sila e suafa ia Karen Stephen o loo galue ma le Matagaluega o Punaoa Faanatura ma le Siosiomaga auā le tuufaatasia o fuafuaga faataatitia mo le tali atu a ofisa faasalalau. O se galuega ua suia ai fuafuaga sa iai i le tulai mai ai o le tsunami o le 2009.
O le fonotaga faaleaoaoga na faatautaia mo sui o ofisa nei e lua na toe iloilo ai loa galuega e fia faaopoopo, ae o ā foi nisi o mataupu ua faapea ona moomia le faaopoopo i nei fuafuaga.
Na talanoaina tulaga o nofoaga saogalemu i le faatinoga o galuega tau faasalalau, ma e pei foi ona silafia o ofisa o le vaaitau, o le ofisa o le 2AP ma le TVOne e sosoo lava i Mulinuu, ma o se nofoaga o lea ua faamaonia le leaga tele i taimi o galulolo aemaise o taimi o afā ona e lio e le sami itu uma e lua. O loo iai nofoaga lata ane e mafai ona agai i ai ina ia mautu faasalalauga ma faaaauau pea, peitai e lei faataitaia i le taimi lenei.
O le fonotele a malo tau atiae o le lalolagi le SIDS lea la ua faamautu ai se nofoaga mo ofisa faasalalau lava ia, ma o i lea o le a vaavaai i ai nei ofisa faasalalu e talosagaina le faaavanoa mo taimi nei o faalavelave faafuasei ma faalavelave faalenatura i le lumanai auā e mafai ai ona faatino galuega nei i le saogalemu ma le mamao ese o Tuanaimato ma nofoaga ia e ta‘ua o nofoaga maualalalo auā le faatinoga o lenei auaunaga.
Ua mae‘a foi ona talanoaina le tulaga o le lelei atoatoa o fesootaiga i le va o i latou e aumai ai faamaumauga ma lapataiga ma sui o ofisa taitasi ua tofia nei mo le faasalalauina o lapataiga ina ia mautinoa le vave ma le sa‘o o faamatalaga e avatu i le atunuu i taimi o faalavelave nei.
O le faaaogā o ualesi ua unai e ofisa faasalalau ae see ese ma telefoni, ona o faalavelave tetele ua tuanai na manino ai le poloka o telefoni i le faigata ona fesootai talu ai le itu lea ua talanoa uma le atunuu ma aiga ma uo e faatatau i faalavelave nei ae leai ai se avanoa e sao ai fesootaiga i telefoni i le va o taimi o faalavelave faafuasei ma le ofisa o le vaaitau ma ofisa faasalalau.
Ua iai foi fuafuaga i masini e mafai ona vave aveese e ofisa faasalalau i taimi e tulai mai ai loa lapataiga mai le ofisa o le vaaitau ina ia agai sa‘o ai i Tuanaimato poo fea lava nofoaga maualuluga mo le faatinoga o faasalalauga i taimi o afā ma se galulolo.
O nei taumafaiga uma ua malilie nei ofisa ina ia lava le taimi e sauni ai tagata o le atunuu, ma ua faataitai nei foi e le vaega o tali o faalavelave faafuasei sailini i nofoaga eseese ina ia lapatai ai le atunuu i le taimi lava e tulai mai ai se mafuie tele ae o le agai mai foi o afā fulifao ma galulolo.
