O taleni, o agavaa ma tomai eseese e pei ose tagata e nate faalauiloa ni laei poo se Model e le fesiligia ose galuega e maua ai faamanuiaga tau tupe. O Sam Tautua ose tamafanau a Samoa e faamautu i Ausetalia lona aiga ua avea nei ose tasi e lauiloa tele ile faalauiloaina o laei i totonu o Peretania e pei ona faafaigaluega ese kamupani e su‘iina laei eseese.
Ole vaiaso ua mavae sa ia afea ai Samoa ise valaaulia ale kamupani faaali laei ole Samoa Sinnet Fashion. Faaalia ele tamaitai pule ole kamupani o Enid Westerlund ole tasi lea o vaega tāua i lana pisinisi ole su‘iina o laei o sikaili eseese, o tagata e faalauiloaina.
Fai mai Sam Tautua ose galuega e lelei faamanuiaga tau tupe e maua ai. O lona talitonuga e toatele tamafanau a Samoa e mafai ona latou faia ae manaomia se tagata e pei o ia, e maua ai fautuaga mo nisi o alii ma tamaitai talavou o loo fia avea ma Model.
O Sam sa galue ose tagata faasalalau ise fale televise i Ausetalia, sa galue foi ise ofisa o mataupu tau tulafono peitai sa leai sona manatu ole a suia ise isi galuega fou nate lei mafaufauina.
“E toatele lava nisi o a‘u uo na fautua mai oute mafai ona avea ose tagata e faalauiloaina laei ae sa ou fai iai e le o sa‘u taleni”. Peitai na faamatala lava Sam na maua sona valaauina mai se kamupani i Peretania e malaga atu se‘i latou talanoa ona e iai lo latou talitonuga e fetaui o ia ile galuega ole Model.
“Sa ou alu ma le leai o so‘u talitonuga e mafai ona ou faia, ae ina ua mae‘a uma sailiiliga ale kamupani i lo‘u tagata na latou fai mai, uso o lau galuega moni lea”.
E lei leva ona taumafai nisi o pisinisi su‘i laei i Samoa e faia ni faaaliga laei poo ni fashion show e faalauiloa atu ai a latou ituaiga o ofu ma laei, ma e talitonu Sam ole amataga lelei lea ole tomai e faalauiloaina laei poo se Model mo fanau a Samoa.
Ole molimau foi lea ale tamaitai o Enid le pule ole Samoa Sinnet Fashion ose galuega ua tatau ona silasila iai le Malo e saili ni fesoasoani mai fafo e atinae lelei ai. “Oloo taumafai lava la‘u pisinisi e saili tama ma teine talavou e faia a matou faaaliga ae ua ou iloa ai le talenia tele o o tatou tagata i lea tomai ma ua ou manao e unaia pea ma saili mai tagata polofesa e pei o Sam Tautua e fesoasoani io tatou tagata ua amata ona fiafia i lea foi galuega”.
O Iulai ole tausaga nei ole a faia ai le faaaliga laei ale tamaitai o Enid ma lana pisinisi. Ole a auai ma le alii o Sam Tautua nate faalauiloa nisi o laei ma ofu ua su‘iina ele pisinisi su‘isu‘i a Enid Westerlund.
