Galuega lelei—Felosipi ma Isi Uso

O le naunautaiga lava ina ia manuia ma sologa lelei polokalame faataatitia i le tuputupu ae o tupulaga talavou i soo se vaipanoa o le atunuu nei, o se tasi lea o faanaunauga o i latou sa tuufaatasia le faamoemoe o le mafutaga a tupulaga poo le Young Peoples Fellowship lea foi na faataunuuina se tasi o a latou polokalame taua i le faaiuga o le vaiaso na tea nei i Sandringham.
O taaloga eseese na mafai ona faatulaga mo i latou na auai i lenei faamoemoe lea na mafai ai ona maua le avanoa e manumalo ai i faailoga o meataumafa ma mea e manaomia i aiga i aso taitasi. O le matagofie o lenei taumafaiga e pei ona feagai ai ma taaloga e pei o le Bingo ma isi ina ia maua ai foi le avanoa e fesoasoani ai le talavou i matua e ala i faatauga o le vaiaso pe afai e foi i le aiga ua manumalo i nisi o faailoga o loo mafai ona tuu ane faatasi e fai ai faailoga e pei o le pepa suka, taga araisa, pusa moa ma isi oloa tuuaisa o loo ua taugata nei.
O le aoga foi o nei mafutaga ona e maua ai le avanoa o le tama ma le tina atoa ai ma le fanau e mafuta faatasi ai e ala i taaloga ma fiafia ai faatasi o se aiga. O se tasi lava lea o itu sa mataituina i le faamoemoe o le mafutaga i le vaiaso talu ai, lea foi o le a agai atu i nisi o polokalame e pei o le atinaeina ma le faamalosiau i le ola faaleagaga atoa ai ma tulaga tau le aoaoga mo fanau aemaise lava foi talavou.
O suka, taga araisa, o pusa moa ma le tele o nisi o oloa sa foaiina e nisi o pisinisi e fesoasoani e saili ai se seleni e faatino ai polokalame o loo faagasolo nei e atinae ai olaga faaleagaga atoa ai ma tulaga tau i aoaoga mo fanau laiti faapea tupulaga talavou. O le Aso Toonai na sosoo ai sa faatino ai galuega faaaposetolo a alo ma fanau a le Young Peoples Fellowship i le faamamaina o le fanua i St Francis Retreat Centre i Hillisborough.
O lenei faamoemoe o loo tuufaatasia lava e le susuga Asi Tupai Pa‘u ma le ekalesia Katoliko – St Benedict’s Catholic Church, ma e tatala lava le avanoa mo soo se tasi e fia auai ai poo se talavou foi o loo manaomia le fesoasoani i le itu tau aoaoga, ae le gata i lea o le maua ai o le avanoa e feiloai ai talavou ma fealofani faatasi i le alofa o le Atua.