Galue le susuga ia Less Teleaga e faalelei olaga o fanau aoga

Nisi o alo ma fanau o loo taumafai o latou olaga e se tasi o tamalii Samoa
Nisi o alo ma fanau o loo taumafai o latou olaga e se tasi o tamalii Samoa

Ua faailoa e le susuga ia Less Teleaga o se tasi o alo o le atunuu ua galue nei o se faiaoga i le toe faafaileleina ma le toe tapueina lelei lea o olaga o fanau aoga ua le toe talia i totonu o aoga maualuluga ma kolisi ona o le faaletonu o latou olaga, le faigata o olaga o nei fanau o loo faaalia i totonu o aoga ma o latou aiga. O fanau aoga ua 12 tausaga agai atu i le 15 tausaga o loo aofia ai i totonu o lea faalapotopotoga o tamaiti aoga, ua tutuli ese pe ua le toe talia i totonu o aoga ona o a latou amioga e faaalia. O le puipuiga a pulega aoga ma faiaoga faatasi ai ma tulafono i totonu o aoga, e mafua ai ona le talia ni tamaiti faapenei ona e aafia ai ma isi fanau aoga.

O le susuga ia Less Teleaga sa galue muamua o se youth worker i Manurewa High School, ma o iina sa vaai muamua ai i ituaiga tamaiti faapenei ua le mafai ona taliaina i totonu o le aoga. Ma ose faanoanoaga ia te ia, ona sa auai ai ma fanau Samoa i totonu o ia tamaiti ua le taliaina i le aoga. Na ia taumafai e fai se galuega lelei e laveaina ma sefe mai ai nei tamaiti, aepeitai e malosi lava le tulafono i totonu o aoga.

O lea ua galue i totonu o le Target Education, ma ua fiafia ai foi e galue fesoasoani i tamiti aoga ua tutuli ese ma aoga, aua o le Target Education latou te le tuua tele foi i tulafono e ono faasa ai tamaiti. Aua e le ma iloa poo le a le mafuaaga ua faapenei ai olaga o nei fanau aoga, pe mafua mai i totonu o aiga poo le mea o le tele lava o le fai uo o tamaiti.

O le sailiiliga la a le susuga ia Less Teleaga i le tele o nei fanau, e mafua mai le faaletonu o latou amio, ona o fanau a tagata o loo i totonu o kegi. Ma e foliga mai o le tuputupu a’e ma le feola a’e o nei tamaiti o loo latou vaai i le siosiomaga o loo iai o latou matua ma aiga. Ua lua nei tausaga talu ona galue le susuga ia Less i totonu o le Target education ma ua fiafia ai foi e faatino lana galuega fesoasoani nei mo fanau aoga.  O le molimau a lenei tamalii o le atunuu, o le galuega e faigata le tau fofoina o olaga o fanau, aua e iai tamaiti a fai atu iai ae tau oso mai ia te ia, e iai foi fanau e matua le ano mai lava i le mea lea e fai atu iai. Ae o lona onosai ma lona tomai masani i le faafaileleina o fanau faapenei o loo mafai ai ona gauai nisi o tamaiti i le mea o loo ia naunau e faailoa i tamaiti. I totonu foi o le siosiomaga o fanau nei, e vaaia ai lava le galulue faatasi o tamaiti ma faafesoaai o latou lagona i le taimi e fai ai ni mea aoga, e ola fealofani aemaise foi pea oo i le taimi e o ai i le gym mo ni a latou faamalosi tino.

O le tele foi o lana galuega faatino, e vaai atu loa ua lelei lea tamaititi ma ua iai le suiga o lana amio, ona toe fesootai atu foi lea i le pule aoga o lea aoga e taumafai e toe avatu iai le tamaititi e faaauau ai lana aoga. Ua iai fanau i totonu o lana polokalame ua suia olaga o tamaiti, ua iai foi fanau ua faaauauina latou aoaoga i totonu o le AUT ma maua galuega lelei. Tele foi aiga ma matua ua toe maua lelei mafutaga ma latou fanau ona o lana galuega o loo fai ai i aso uma.

O le tele foi o taimi e faailoa ma faasoa ai le susuga ia Less Teleaga i le soifuaga ma le aganuu a Samoa i nei fanau. Ma ua faailoa ai le fiafia o nei tamaiti e auai i nisi o polokalame Samoa e pei o le Walking Samoan lea e faia i Otara i aso tofi o vaiaso taitasi, lea e fiafia tamaiti e faatasi atu iai.