Galue Faamausili Moli e toe tuufaatasi lona aiga

 O le afioga Faamausili Moli Malietoa i le ogatotonu, o lana loia le afioga Taulapapa Brenda Heather Latu, susuga Papalii Li’o Masepa’u o se loia a’o se tasi o le aiga o Faamausili faapea alo tamaitai e toalua e faasino i le Aiga Sa Malietoa. O le ata na pue ina ua mae’a ona lau le faaiuga a le faamasinoga faasaga i le afioga Faamausili Moli Malietoa
O le afioga Faamausili Moli Malietoa i le ogatotonu, o lana loia le afioga Taulapapa Brenda Heather Latu, susuga Papalii Li’o Masepa’u o se loia a’o se tasi o le aiga o Faamausili faapea alo tamaitai e toalua e faasino i le Aiga Sa Malietoa. O le ata na pue ina ua mae’a ona lau le faaiuga a le faamasinoga faasaga i le afioga Faamausili Moli Malietoa

“Faafetai i le Atua ua mae’a le faamasinoga ae ua lagona o le a galue e toe tuufaatasi lo’u aiga ina ia maua le ola fiafia ma fealofani”.

Ua talia e le faamasinoga le talosaga a le tamaitai loia le afioga Taulapapa Brenda Heather Latu ina ia faapafala se faasalaga e aunoa ma le faamaonia o moliaga o le afioga Faamausili Moli Malietoa. E tolu moliaga na faamaonia o Faamausili ina ua mae’a ona valaau molimau a leoleo ma molimau a le ua molia.

O moliaga o le lafo o upu faalumaluma, umia o se meafaitino, ma le umia o se aupega matautia o le ipu malamalama. O ia solitulafono na molia ai le tamalii e mafua i se vevesi na tupu i se talanoaga a le aiga o Faamausili na aofia ai se tasi o ona uso le susuga Papalii Titiuatoa Malietoa, ma le atalii o lona uso le susuga Papalii Malietau.

Ua talia le talosaga a le loia a Faamausili ona ua silasila le faamasinoga oni solitulafono e maualalo lava lona faavasegaina i le fua o soligatulafono. O Faamausili o le nofo lea o le a sosoo i le suafa Tupu o le Malietoa e pei ona isi se faaiuga a le faamasinoga o Fanua ma Suafa ia Tesema o le tausaga ua mavae 2017.

Peitai ua taoto i foga a le Malo ni talosaga ua toe lu’i ai lea faaiuga ma e lei faamautuina se aso e valaau ai mo le suesueina. Ua faafetaia e Faamausili Moli le tapuaiga a lona aiga aemaise o le atunuu sa faanono manu i se faaiuga e taunuu iai ona moliaga. “Ou te faafetai i le Atua ona o le faaiuga ua aumai ma ou te lagona o se taimi tāua lenei ma se laolao e faatino ai galuega mo le toe tuufaatasia o le aiga ina ia teuteu ni vala sa va ai le fogavaa ina ia maua le ola fiafia ma le ola fealofani”.

E iai nisi mataupu o loo taoto i le faamasinoga maualuga faasino i le lotoifale o le aiga e pei ona faailoa e le loia le afioga Taulapapa i lana folasaga mulimuli a’o lei lauina le faaiuga.

O ia mataupu o loo aafia ai foi le afioga Faamausili ona o se talosaga a Papalii Malietau ma isi o loo finauina ai le tagata e tatau ona pulea meatotino ma isi aseta a le tuaa o Faamausili ua tuumalo le Susuga Malietoa Tanumafili II.

O loo iai foi i le faamasinoga maualuga se tagi o se su a Papalii Malietau ma isi o loo finau ai e totogi atu e Faamausili se taui tupe e 40 afe tala. O le Aso Faraile ua mavae 22 o Iuni 2018 na lauina ai le faaiuga o moliaga na molia ai Faamausili. O le afioga i le tamaitai faamasino, Talasa Atoa Sa’aga, sa tauaveina suesuega o le mataupu.