Ua iu le tausinioga i aoaoga, ua tali foi tatalo ma tulivae o matua ma aiga e pei ona nofo tapuai ai, ao alo le tamaitai o Agnes Iulia Maeu Lavea Levi i le sailia o le poto salalau i totonu o lenei atunuu. Ua ae manuia le faiva o le tautai ua patipatia ai le alofa ma le viiga o le Atua e aiga malaga mai Samoa, Christchurch, o uo ma e masani i le faleaiga o le valentines i Pakuranga i le afiafi o le Aso Faraile, ae le gata i lea o susuga i faafeagaiga sa auai e molimauina le faamaoni ma le lelei o le Atua i le soifua aoga o Agnes Iulia.
O le susuga le faafeagaiga ia Rev Elder Leiite Setefano na taitaiina le polokalame o le po i le sauniga lotu. Ao le susuga ia Filipo Levi sa fai ma fofoga o le aso ae sa vaavaalua ma le alii o Tuitama Tipasa.
O le po o le fiafia ae ua avea foi o se amataga fou i totonu o le aiga ona o lenei laasaga fou ua ausia e le fanau ma faafiafiaina ai matua ma siitia ai le tulaga maualuga o aiga.
O Agnes Iulia na amata mai lona soifua aoaoina i aoga tulagalua i Christchurch ao galulue faafaifeau ona matua i le Ekalesia Perepereane i North Canterbury i Christchurch. Ina ua siitia mai ona matua i Aukilani ma galulue ai i le galuega le Atua, na toe faaauauina lana aoga i le Kolisi o Tamaki i le 2003 seia oo atu i le 2006, sa avea o ia ma Headgirl i lea tausaga, ma sa dux ai foi lea kolisi, ma faamanuiaina ai i le sikolasipi i le Univesete i Otago i le tausaga 2007.
Na study lana Bachellor of Law ma le Bachellor of Art ao iai i totonu o le Univesete, sa galue foi o se faiaoga fesoasoani i nisi o tamaiti aoga, ma e 5 foi tausaga sa avea ai ma taupou a le Univesete i Otago.
O le aso 16 o Me 2015 na faauuina ai loa lona taumafai i le Univesete i Otago e ala i ana faailoga o le Bachellor of Law ma le Bachellor of Art, ao le aso faraile ua mavae 2 o Oketopa sa faauuina ai i le Bar o le High Court of New Zealand i Aukilani e avea ma loia i totonu o Niu Sila.
O le mitamitaga ma le fiafiaga i matua ia Fogatia Lavea Levi ma le faletua ia Ioana Lavea Levi aemaise o le fanau, o le tulaga maualuga ma le faaea aiga o le tamaitai ia Agnes ua siitia ai le aiga i le isi laasaga fou o le soifuaga.
