O le malofie a Samoa o se laei lea tatou te mitamita ai, auā e iloa ai lo tatou faasinomaga ma o tatou tupuaga, ae lē gata i lea ua iloga le tatau ma le malu i soo se atunuu o le lalolagi ma o se mitamitaga lea ia i tatou uma auā o se avefu‘a mo lo tatou atunuu.
O le afiafi o le Aso Faraile ua mavae 24 o Iulai na molimauina ai lagona o le fiafia ma le loto faafetai i le tamā ia Toleafoa Ipu ma le tina ia Tulua ma le fanau faapea aiga uo ma ē masani ina ua iu ma le manuia le faatamasoaliiga sa nafa ma le matua o faiva ia Tulouena Laulu Andre ma le aiga Salemalama, i le tāina o laei o le susuga ia Toleafoa Siaosi ma lona faletua ia Tina faapea lo la alo ia Enele Toleafoa faatasi ai ma le faletua ia Joyce Toleafoa Filivao ma lona alo ia Senerila Toleafoa.
E tasi le masina ma vaiaso na faagasolo ai lenei faamoemoe, ma o se mitamitaga ia i latou ina ua tau lau o le faamoemoe. O se amataga fou i totonu o le aiga pe a toe tepa i tua i le tiga ma le faigata sa tauasa mai ai, ae o le faafetai i le tapuaiga a mātua ma aiga ua mae‘a ai le galuega fita sa punouai ai.
O le tofa ia Talo Tuu Ofisa Telea sa fai ma fofoga o le po ma o ia foi sa fai ma sui o aiga e momolia le faafetai i le agaiotupu ma lona falefa aiga salemalama.
Na faaiu lea po fiafia i le taumafataga ma fiafia e patipatia ai malu ma tatau ua laei ai le fanau.
E mitamita i measina a Samoa auā a fesili i le tatou tupuaga o le tali, “O a‘u o le Samoa.”
