E oso a‘e le la ma toe goto atu, e sua mai foi le tai ma toe pe atu, ae lē mafai ona galo pe sola ese i loto ma agaga o le faletua ia Maria ma ona alo faapea aiga na lua uiga tausaafia o le tama ia John Ioane Ng Chock i totonu o le aiga faapea ona aiga ma lana Ekalesia e pele ia te ia. O se tamā e faagalo gata auā o se tama osi aiga ma tautua lotu.
O le aso 17 o Aukuso i le tausaga 2014 na lē atoa ai le fuainumera i totonu o le aiga ona ua faamanavaina e le Atua galuega a le tamā a o feagai ma le gasegase. E ui i le oona o le ipu ma le faigata ona o le lupe ua lele, ae pule lava le Atua soifua o ia na te aumaia o ia foi na te toe ave ese.
O le masina lenei o Aukuso ua atoa ai le tausaga talu ona motusia le mafutaga a le tina ma le fanau ma le tamā. Ae o le Aso Toonai, 22 o Aukuso na tatala aloia ai lona maa faamanatu talu ona alu le malaga ma ua atoa ai foi ma le tasi le tausaga.
O se aso lagilelei ma le matagofie a o osi le taulaga o le Misasa i le malumalu o le Ekalesia Katoliko St Peter Chanel Parish i Papatoetoe e le afioga ia Father Patele Felise. Sa auai uma aiga na lua, o uso ma tuafāfine o John Ioane Ng Chock mai Ausetalia ma Samoa, o uo ma ē masani e molimauina le tatalaina o lona maa faamanatu.
Sa faapea foi ona auai ai ma le aufaigaluega a le tina ia Maria le Blue Bird lea ua savali nei i le 25 tausaga o lana tautua ai i totonu o lenei kamupani. Na mae‘a le sauniga ona agai lea i le fanuatanu i Manukau auā le tatalaina le maa.
O le afioga lava ia Father Felise sa saunia le tatalo e faapaiaina ai le maa, ae o le alo lona lua o le tina ia Maria le alii o Marvin John sa tolaulauina alofaaga ma faamanuiaga o loo tusia ai. O le faamalosi ma le fafagu a le taitai, na ia ta‘ua ai o le maa lenei, e toe to manatu ai i galuega lelei a le tamā, auā o le lalolagi lenei o loo tatou nonofo ai, e tapena ai lo tatou ola i le nofoaga i le lagi. Sa saunia e aiga na lua pesepesega i le fanuatanu e momoli ai o latou alofaaga ma faamanuiaga i le tamā. O lupe papae sa faaleleina, o le ata vaaia o le lupe ua lele ese atu ma le aiga ua lē toe iloa atu.
Sa faaiu le faamoemoe i le hall a le Ekalesia i Manukau i le taumafataga. O le tofa ia Seumanu Francis Ioane sa fai ma fofoga o le aso, e faafeiloai le mamalu o le auvalaaulia ma faatautaia le polokalame, ae o le tofa ia Seululu Aleti Afoa sa fai ma sui o aiga na lua e tu tootoo i faaaloaloga e pei ona masani ai aso faapenei.
O le tofa ia Tupuanai sa fai ma sui o le Ekalesia ma le auvalaaulia e tali faitau i le tootoo o le aso e tusa ai ma le maau ma le milomilosia sa feagai ai. O le tāua ma le maualuga o lenei faamoemoe ua lē gata i le tatalaina o le maa, ae o se avanoa ua mafai ona toe feiloai ma mafuta ai aiga, auā o lupe sa vao eseese a ua fuifui faatasi i le alofa o le Atua Soifua.
