Gagau e le Manu apaau o le Aeto

Ua atili ai le maualuga o le feleleai a le Manu i tulu‘iga o le lalolagi i le taimi lenei, ina ua ia sosoli apaau o si Aeto a le USA i le faaiuga o le vaiaso talu ai, ma toe pōpō mālie ifo ai i lalo le fiafia o le ‘au a le Malo malosi, e pei ona iai le iuga o le la taaloga amata o le taamilosaga o le Pacific Nation Cup i le aoauli o le Aso Sa i le taimi Niu Sila.

O le tele o tusitusiga i luga o upeta tafailagi ua ta‘ua ai e foliga ua faafefe e le Manu Samoa ‘au uma i le sauni atu ai i le Ipu o le lalolagi, talu mai lava ona mae‘a le la taaloga faitaulia ma le Olopeleki a Niu Sila lea sa taitasi ai sikoa i le taaloga atoa.

Ae o lenei foi la ua foliga mai i le uluai taaloga a le Manu Samoa ma USA, ua sese le taimi e oso mai ai le Aeto e fitifiti le pute o le Manu, o le taimi o lea e lei iloga ona toe maalili ifo i lalo le aasa o le toto o le manu lea ua tau fōfō ai nei manu‘a o le Olopeleki i le tasi o lana sikoa i le la taaloga faitauina ma le Manu i le Apia Park.

E lei faigofie i le Aeto a Amerika le sueina o sona avanoa i le laina sikoa a le Manu i le ‘afa muamua o le taaloga ona o le malosi tele ma le lelei o le puipui mai a le Manu. E uma le ‘afa muamua ua tau‘ai Samoa e 21 i le 3 a le USA.

O ‘ai na o le Manu Samoa na maua i le uigi logologoā le malosi ma o le kapeteni foi lea o le ‘au le alii o Alesana Tuilagi faapea ma le fulupeki le alii o Ahsee Tuala, ae o isi ‘ai na maua i le kiki i le pou a le first five eight ia Patrick Faapale. O le maitau a le aumaimoa ma le lalolagi i le taimi nei i le Manu Samoa, ua fai si faigata ona toe suesue auala i ai ‘au i le malosi ua iai.

O le osofaiga i le ‘afa lona lua na suia ai le maimoa a le lalolagi i le osofai malosi a le Aeto, ma sa telē ai foi le suiga o tama taaalo a le Manu i lea taimi ina ia puipuia lava le tulaga maualuga o le malosi ua iai, ma sa lē faatamala ai foi le taumafai atu o le Eagle ina ia maua le laina sikoa a le Manu Samoa, ma sa iu ai lava ina latou laasia, e se tasi o alo o Samoa o loo taalo ai foi i le ‘au a Amerika, le alii o Titi Lamositele, faatasi ai ma sala na maua i le kiki i le pou.

E lei toe maua se ‘ai o le Manu i le ‘afa lona lua, lea na mae‘a lava le taaloga o tumau ai ‘ai o le Manu Samoa i le 21 ae see mai le USA i le 16.

Ma o le mae‘a ai o le taaloga muamua a le Manu i le Pacific Nation Cup ua toe silasila ai le pulega o le ‘au i se isi suiga o le a iai le tapenaga ma isi ‘au o loo mulimuli mai.

Photo by: Ken Aiono Photo by: Ken Aiono Photo by: Ken Aiono