Ole ekalesia ole Light of Life i Otara oloo galulue ai le susuga ile faafeagaiga i Hakai Mafi ma le faletua ia Fualilia Mafi, ose tasi lea o ekalesia na mafatia loto o tagata ile polokalame ale susuga ia Lalau Fuimaono lea sa faasavali i totonu o aulotu.

E pei ona ta‘ua ele susuga ile faafeagaiga ia Hakai, e $7000 le tupe ale aulotu sa alu ai i lea polokalame. E $2000 le tupe ale aulotu, $2000 le tupe ale autalavou ma le $3000 ole tupe ale faifeau ma lona faletua.

O lenei seleni sa faaaluina lea ina ua manaomia e Lalau se tupe e faagaioi ai pepa ole fale, ma ole taimi lava na tuuina atu ai pepa ole fale ile faifeau ma le aulotu, na lē toe vaaia ai foi ele ekalesia le tino o Lalau, ma le tala ale faifeau e le iloa poo fea na aumai ai lea pepa na alu atu ma Lalau.

Ole tautalaga a Lalau ile faalamalamaina o lana mataupu i totonu ole ekalesia, o iina na seetia ai lagona ole faifeau ma le aulotu ile malu o faaupuga ae ese ai le agaga oloo mulimuli mai tua.

Ole lagona ole naunau ma le fia fai mea lelei ile Atua ma lana galuega, na fai ai le faifeau ia Lalau afai ae faamaonia lenei polokalame, ole a tuuina atu loa le ma fale motu e taofi ai le aitalafu, ae peitai sa taofiofi lava le faletua ona e le iloa pe faamaonia lenei mataupu, ae sa taumafai lava le faifeau e finau atu e foai le fale, ae tu malosi lava le faletua e taofi le fale.

Ole fale oloo i tua ole falepa‘u ale Tyre Wold i Otara ole fale lena sa faaaogā ile aoga faataitai lea sa faasino e Lalau ile ekalesia lenei e o e vaai mo latou, e fitu potu ole fale ma falelēta‘ua e tolu (tulou) ma o iina na atili ai ona seetia le faifeau ile polokalame lenei.

E $650,000.00 le tau ole fale, ma ua naunau ai lava le faifeau e faatau. Peitai na alua‘i alua‘i ua vaai atu lava le ekalesia ua leai lava se fale ma ua solasola foi Lalau ma lē maua se fesootaiga seia oo mai ile taimi nei. Ta‘ua ele faifeau ua latou faamagalo iai ile latou tupe sa faaalu i lenei polokalame taufaavalea.

Ole Ekalesia New AOG, ose tasi lenei o aulotu sa faailoa foi ele susuga ile faafeagaiga ia Vaise Sila ma lona faletua sa afaina ai foi i lenei lava polokalame, a‘o iai ile la ekalesia ole New AOG i Papakura.

E $2000 ma ona tupu le tupe sa faaaluina ai ia Lalau ina ua tapa mai se $1000.00 e fai ai le Trust ole lotu faatasi ai ma tupe sa faaaluina ile tausiga e ala i meaai ma tupe sa aveina iai. Ole fale poo le Warehouse i Takanini ole fale lea sa faasino e Lalau i lea foi ekalesia e fai mo latou, peitai sa lē mafai foi ona latou mauaina ona ua solasola foi Lalau ma le latou aulotu.

Ile taimi nei ua suia mai le laua galuega i Otara ma ua mautu ai le lotu, ma ua suia ai foi le igoa ole lotu ile Joyful Christian Ministry, ae ta‘ua ai foi ele faafeagaiga sa toe oo atu ai foi Lalau ma avatu ai nisi o tagata Samoa fai mai e o atu e vaai le fale, ae leiloa e Lalau o laua lea ua mauaina le fale lea mo latou sauniga.

Ma ole oo atu ai o Lalau i lea fale, ma maua ai le avanoa e talanoa ai ia Lalau, ua matou faamagaloina au mea sese ia sa fai, ae aua ete toe faia oloo oi le tele o aulotu ia oe, ma sa maua ai foi le avanoa e talanoa ai i ia tagata sa oatu ma Lalau e mataala ile tagata lenei e tumu ile pepelo ma le taufaavalea.

Ose tasi o aulotu e le mananao e faailoa le igoa ole latou ekalesia, ua latou tautino le loto faamagalo i faiga piopio ma le taufaavalea sa faia e nei tagata i totonu ole latou aulotu. E ui ile leaga ma le sese o auala oloo saili ai latou tupe ae oloo silasila le Atua ile tagata ma lana mea ua fai, ma o lea foi ua toe solosolo lelei le latou galuega ile taimi nei.

Lē sao auala piopio a Lalau ile Ekalesia Holy Word Worship Centre

Ta‘ua ele susuga ile faafeagaiga ia Fiti Ulia, pe tusa ma le lua tausaga talu ai sa latou lolotu ai ma le uso matua o Lalau le susuga ia Karlos. Sa fai ma tuu alu atu Lalau ma latou lolotu i lena vaitaimi, ma taumafai atu ai ana polokalame nei i totonu ole latou lotu. Alua‘i, alua‘i, ua fiu Lalau e taumafai atu ana polokalame ma taumafai mai ni tupe ale ekalesia mo lana polokalame, ae lē maluelue lava le loto ole faifeau e musu e ave iai se tupe, ma o iina na teva ese ai loa Lalau mai le latou lotu ae agai ai loa i isi aulotu ia ua afaina.

Saunoa le susuga ile faafeagaiga ia Fiti Ulia, e alu ese Lalau ma le latou ekalesia e leai se tupe a latou na alu ai, ae pau le itu lelei sa maua mai ai, ona sa fai ai le latou faaputuga tupe i lena vaitaimi, ma ina ua lē taunuu polokalame a Lalau sa tau fuafua i totonu ole aulotu, sa toe tala mai i tua tupe a tagata ole lotu ma toe tufa.

Ole tuualalo ma le fautuaga ale susuga ile faafeagaiga ile lautele ole atunuu ia mataala i ia ituaiga tagata.

E pei ona lomia foi e nisi o a tatou lomiga ole Samoa Times le aulotu AOG i Panmure lea sa oo ai foi lenei polokalame ma faasese ai tagata lolotu, ma oloo maitauina ai le tele o aulotu poo ekalesia oloo safa ma faaletonu loto o tagata ona o lenei polokalame.

Ole lomiga ale Samoa Times ile aso 21 o Mati lea sa lomia ai le tusitusiga e faapea, “E lē o sa‘u pisinisi ole pisinisi ale Atua”, na faailoa ai le tele o lagona lē fiafia o susuga i faafeagaiga ile saunoaga lea ale susuga ia Lalau, ona ole pepelo ma le taufaavalea oloo fai nei i totonu o aulotu ma ekalesia.

Ole fautuaga ma le tuualalo a susuga i faafeagaiga sa mafai ona fesootai iai le tusitala, ia mataala aulotu ma tagata uma i nei galuega taufaavalea.

Comments

comments