Fusuaga o le 2009, fesoasoani mo le galulolo

Ua faalauiloa mai nei e le pulega o le faletaalo a le Eagle Academy i North Shore, atoa ai le faalapotopotoga o fusuaga, se fusuaga tele ua fuafuaina e saili seleni ai, mo le fia fesoasoani i mafatiaga ma aafiaga o le mafuie ma le galulolo i le atunuu.
O lea fusuaga sa saunoa i ai le alii faatonu o le Eagle Academy le sususga ia Mac Maatusi Tofilau, o se fiafiaga tele ina ua mafai ona tafa mai ata o le faataunuuina o lea faamoemoe, ina ua faamaonia le lagolago ane a le asosi o fusuaga i lea foi itumalo.
E le gata i lea, ua matua faafetaia foi ma talisapaia faatua eleele, le tuuina ane o le lagolago a nisi o tamalii ma tamafanau iloga a le atunuu i tulaga o taaloga.
O le susuga ia Laauli Michael Jones, Vaaiga Tuigamala, ma le tofa ia Toailetai David Tua, o loo taumafai e tuufaatasia lea fusuaga, ona o se vaega o le faataunuuina o le manaoga o Tavita a o lei faia lana taaloga lea sa fetaui ai ma le alii fusu tautaua o Niu Sila, Shane Cameron.
E manatu Mac ma Ron Hellesoe, o le fesoasoani ane a ia tamafanau iloga, o le a siitia ai se fuainumera o tagata e mafai ona auai i lea faamoemoe, ma maua ai se seleni talafeagai e faatino ai le gaualofa ma le agaga fia fesoasoani mo le atunuu.
Na taua foi e Mac, o le faamoemoe e faia lea fusuaga ona e manatu e tatau foi ona fai se sao o tamafusu, ma le taaloga o le faipele, aua lava mafatiaga o le galulolo, e pei foi o isi taaloga ma koneseti sa faataunuuina, e ala i le faaaogaina o taleni pese, lakapi ma isi.
O le aso 27 o le masina nei o le a faataunuuina ai le faamoemoe i le nofoaga i North Shore Event Centre.
E tele ni paga ua fuafua e taaalo i lea afiafi, peitai o nisi o paga faapitoa o le a fetaui ai le Monty Betham ma Daniel Mackinnon, i le vaega o le middleweight, a o Isikeli Maama ma Gogosina Ulutoa i le paga mamafa (heavy weight).
O lea po, o le a le gata i fusuaga a o le a faafiafia ai foi le Yandall Sisters faapea le alii pese lauiloa o Lapi Mariner.
O le tele o fesoasoani tau seleni sa tuuina atu mo le atunuu talu mai ona aafiaga ma mafatiaga i le mafuie ma le galulolo i le masina o Setema o lenei tausaga, sa maua mai sailiga seleni na fai, faatasi ai ma le anoanoai o kamupani ma pisinisi sa tuuina mai la latou lagolago.
Ae o se vaega sa maitauina ma avea ma faamanuiaga, ona o le galulue faatasi o tagata uma, e lagolagoina auala uma sa faatino ai.
O se tasi o itu taua tele, ona o le faaaogaina lea o taleni ma agavaa o loo i tamafanau a Samoa e sailia ai tupe mo fesoasoani.
E pei ona silafia, sa fai se taaloga lakapi e tuufaatasi ai tamataaalo mai le liki ma le lakapi, o lea taaloga sa fai faaagaga lava ina ia maua ai se seleni mo le galulolo, ae o se sao lea mo i latou o loo iai lea foi taleni.
O le maea o lea taaloga ona sosoo ai lea ma se koneseti pese tele sa tuufaatasi ai foi alo o Samoa i le taleni o pese.
O le faamoemoe lava lea e tasi o le naunau ina ia faatupulaia pea ni seleni e fosoasoani ai mo aiga mafatia.
E pei ona silafia na silia i le $500,000 sa mauaina i lea koneseti i Niu Sila, ae ese mai le $20,000 ma ona tupu sa maua i Samoa lava latou ia, ina ua malaga atu ma faamaea ai le faamoemoe.
E iai le talitonuga o le faamoemoe e pei ona atofaina, o le a lelei se seleni o le a maua ai, ma o David Tua, Vaaiga, Michael, Mac ma Ron, o i latou lava o le a malaga atu e tauaao le tupe i le Palemia o le atunuu.