Oloo nofo taumate pea le Duco Events i faataamiloga a Eddie Hearns male pulega a Anthony Joshua, ona e iu ina fusu Joseph Parker ma Antohny Joshua ile masina fou. E mafua lea ona e oo mai lava ile taimi nei, e leai lava se paga a Joshua ua faamaonia mai mo lana fusuaga ile masina fou. E ui ina lē mautinoa mai fuafuaga ale pulega a Joshua, peitai, ua faailoa e Joseph Parker, o ia ua sauni e fusu ma Anthony ile masina fou pe afai e lē maua se paga a Joshua.
Ole paga a Joshua sa fuafua mo lea fusuaga, ole alii Bulgaria o Kubrat Pulev. Peitai, e oo mai ile taimi nei, e lei sainia lava le konakalate a Pulev mole fusuaga ma Joshua ia Novema.
E foliga taumate nei mea uma, ole umi o nei taumatega, ole mautinoa foi lea ole fuafuaga a Eddie Hearns ma lana vaega, o Joseph Parker lava lo latou faamoemoe mo Novema mai le amataga.
O Pulev e na ole tasi lana faia‘ina i ‘ai, ae o lena foi faia‘ina e tasi ole faia‘ina ia Vladimir Klitschko lea sa siamupini ile lalolagi.
Ole isi itu oloo fesiligia, ole ā le mafuaaga ua taumafai ai Anthony Joshua e tulei ile masina o Ianuari le la fusuaga ma Joseph Parker, auā ole umi ona faatali ole atili lelei foi lea o tapenaga a Parker ma atili faigata ai ia Anthony Joshua se la fetauiga ma Parker.
Ae ole taimi pito sili ona lelei mo Anthony Joshua mole fusuaga lea, ole masina o Novema. Ole talitonuga ole Samoa Times, e sili atu ona lelei mo Parker pe a tuu le fusuaga e faataunuu ile tausaga fou.
Ole a maua le faamaoniga o lenei tulaga, ile vaiaso fou, aso 26 o Setema, lea ua fuafuaina e Eddie Hearns e faailoa ai le paga a Anthony Joshua mole fusuaga ia Novema, poo ai lava le paga a Joshua ole a la fusu, e mautinoa lava le fusuaga a Parker ile masina o Novema, a lē fusu ma Joshua e faataunuu lava le la fusuaga ma David Price.
O lona uiga, o tapenaga ale Duco Events mo Lonetona oloo tapena mo fusuaga nei e lua poo ai lava le fusuaga ole a faamaonia mai, ole fusuaga lena ole a alo atu iai. Oloo faapea foi ona sauni e saili se nofoaga lelei e faamautu iai Parker ma koleni ai i totonu o Lonetona.
E ese mai i tapenaga mo Lonetona oloo faatali pea le faataunuuina ole fusuaga a Parker ma Alexandra Dimintrenko ile aso 1 Oketopa.
Na ta‘ua e Kevin Barry, e toatolu tagata sau‘ai maualuluga na sipa ma Parker i koleniga i Las Vegas e tapena ai mo Dimintrenko na ia ta‘ua foi e 93 taamilosaga tai 3 minute na sipa ai Parker ma tagata ia.
Mole fusuaga ma tagata e maualuluga atu ia Parker, ole a see le faalagolago o Parker mai le vave o ona lima, ile vave ole ‘alo ole ulu. E talitonu Barry, ua ausia e Parker lea tulaga. Ose mea lelei lea, e lē na ole vave la o lima o Parker, ae ua vave foi le gaoioi o lona ulu.
E faamaonia lea, ile pauu uma ole vaega toatolu i taimi na sipa ai ma Parker. Ole faamoemoe ole faiaoga mo Parker ia tutusa le vave ole ‘alo male migoi ole ulu male vave o lima.
Na ta‘ua foi e Kevin Barry, poo Price poo Joshua, ae oloo lava sauni i latou aemaise Joseph.
Ole fusuaga ma David Price lea sa siamupini ile Commonwealth, ose fusuaga lava ua leva ona mafaufau iai le Duco Events.
