E lē o uma viiga o le Samoa Airways mai tagata malaga a le fono Koneferenisi a le ekalesia Metotisi. E pei ona amata gasolo mai ai i le lua vaiaso talu ai, e le gata mo le samiina o le 150 tausaga o le aso fanau o Piula, sosoo mai ai ma le fono a le Auso Fealofani, ae o le vaiaso nei lea ua gasolo ai le Koneferenisi tele i lona laumua i Fogaa Faleula, e oo atu i le Aso Sa, e lau ai foi lana tusi tofiga mo le fesiitaiga o faifeau ma tofiga a le ekalesia.
Peitai, o le viia ai e le Metotisi o le Samoa Airways, ona o le tele o le faamama avega i le taugofie o pasese mo tagata lotu aemaise o taimi pisi ma manaomia ai avanoa mo malaga toatele. O le sinoti lava ia mai Sini, e silia i le 50 faifeau, o faletua, ae o le mamalu o le au usufono mai aulotu, na malaga uma mai lava i le Samoa Airways.
Na molimau ofisa o le failautusi a le malo, e ala i le pepa o faamatalaga, i le faafetaia e le aulotu o le auaunaga ua fetaui ma le pisi. Ma o le agaga lava lea e tasi mai sui o le Auso Fealofani mai Sini Ausetalia.
Mae’a sauniga Faamanatu mo ē ua maliliu
O le lotu faamanatu o ē ua maliliu, sa faataunuuina lea i le malumalu o le ekalesia Metotisi Uesile i Faleula i le Aso Sa. Peitai o le Aso Gafua lava ia, ananafi, “o le aso lea ua faata’ape ai le usugafono i komiti eseese e fa, e soalaupule ai mau mai aulotu taitasi. Ua tele ina mae’a fono a komiti eseese.
Ae o le Aso Lua 10 Iulai, e tatala ai le Koneferenisi tele e ala i le sauniga lotu e ta’ita’ia e le Afioga i le Peresitene o le Ekalesia Rev Apineru Lafai, ma faasolo mai i le Aso Gafua. E vaai ai i mau ua talia ma teena. Ma e alu lava lenei vaiaso o avea ma mataupu lotea, ma oo atu ai i le Aso Sa e fai ai le faauuga o faifeau. Ae afiafi ane ai loa tolaulau le tusi tofiga a le Ekalesia e pei ona masani ai.
Na saunoa foi le Sea o le Sinoti o Apia Sasa’e, “Ua uma fono a Sinoti ma pasia ia mau, mo le fono tele lenei, e faatatau lava i le faatupu laia o le ekalesia i le lalolagi.
Ae vaavaai maualuga lava foi, i ni auala e mafai ona faasoa ai lenei Koneferenisi, aemaise o le faatupuina o le agaga e le gata o le au matutua ae o tupulaga talavou. Ma o le a tuuina atu i totonu o le fono tele. Auā o le fono tele lava e atoatoa ai le vaai ma pasia pe le pasia foi. Afai e le pasia, e mafai loa ona toe vaavaai iai i se taimi oi luma.
O le Susuga i le Sea ia Iose ma le faletua o loo galulue nei i le Sinoti a Apia i Sasa’e, mai Vailoa Aleipata, o le sinoti e afua atu i Luatuanuu, e oo atu i Tafatafa Falealili.
Maualuga le lagolago a le Metotisi i le Samoa Airways
Ua molimauina mai e le ofisa o le Palemia, o le Samoa Airways lava le filifiliga a le toatele o le atunuu, e pei ona avane iai le lagolago malosi a le Ekalesia Metotisi.
Aemaise o aumalaga mai Ausetalia, na matuā tutumu lava malaga mai Sini, talu ai usugafono a le Metotisi. O le vaiaso talu ai, na asia ai le lotoā i Faleula, ma o le maualuga foi lena o le lagolago na iai mai le usugafono o le Auso Fealofani.
O ituaiga lagolago ia na saunoa ai le pule sili o le Samoa Airways Tupuivao Seiuli Alvin Tuala, e maualuga lava le tilotilo iai a le kamupani vaalele a Samoa. “Aemaise ai lava o le amanaia e taitai o le ekalesia o le manaoga o Samoa, ina ia faaaoga le tatou lava vaalele mai Sini ma Aukilani.” O le isi mafuaaga sili o le filifilia ai e tagata o le Samoa Airways, ona o le taugofie o pasese. Faapei foi ona molimauina e tina o le Auso Fealofani i le maota o le Avoka i le faaiuga o le vaiaso, i le faitau selau o sui usufono a le Auso mai atunuu mamao, o le tele oi latou o le taimi muamua lea ua malaga ai i le vaa a Samoa, ae “ua o se faamama avega tele, ae o le tausaafia o lana auaunaga.” E le gata ina “lelei taumafa ae o le taugofie”, na afua ai le faatupulaia o viiga o le Samoa Airways.
O aso uma lava o loo lele ai le vaa a Samoa i le va ma Aukilani, ae faalua i le vaiaso, malaga i le va o Apia ma Sini i le 737-800. E ese mai ana malaga o loo faatautaia e vaa laiti mo Amerika Samoa, le DHC Twin Otter.
Ua faatalitali ai le usugafono a le Ekalesia Metotisi mo se isi faigamalaga fiafia i aiga i Ausetalia ma Niu Sila, i le taimi e uma ai le Koneferenisi i le Aso Sa oi luma.
