Fufusu i le mae‘a ai o le Youth Alive

E lei toe foi mai le Ofisa o Leoleo i se talosaga pe o iai nisi ua molia pe ua fesiligia foi i le tau‘aigamaa lea na tulai mai i le vaiaso na tea nei na aafia ai tupulaga o le afioaga o Vaimoso atoa ai le afioaga o Taufusi.

O le ausiva a le tupulaga mai Taufusi na sola ma le faailoga muamua o lenei tausinioga lea e $10,000 (tala Samoa) le aofai ae ua faapea ona toe faaleaga lava e le fanau lenei taumafaiga ua mae‘a ma na tulai mai le vevesi i Tuanaimato ma agai mai ai lava i Taufusi ma Vaimoso.

O le pulega a alii ma faipule o le afioaga o Vaimoso lea na faapea ona vave lava le agai i fale o le fanau na laumanuia solo le aafia i nei vevesi. O le faiga na tali mai ai le pulega a alii ma faipule o le afioaga ua ao uma fanau nei ma faapotopoto mo se aoaiga ma ua lē faatali lava foi le afioaga i ni sui o Taufusi ona o le manatu e tatau ona faasa‘o le fanau ma faatonu i le taimi e tulai mai ai ni pefea ina ia taofia ai le faaauau o ni vevesi.

E silia i le to‘a 20 le tupulaga talavou na aafia i lenei mataupu ma o le fanau lea na faapea ona tuu atu i ai e le nuu faasalaga e ta‘i $100 a le tamaititi ma na faasolo foi matai ua aoai i le fasi o nei alii talavou.

E lei tigaina ae e toatele na fetagisi lava ina ua toe foi i aiga ma aoga o le taeao ina ua mae‘a fesagaiga ma toeaiina o le nuu ua matuā tumu i le lē fiafia talu ai le toe ta‘u atu o le igoa o le nuu i lipoti ma faasalalauga i le faamimisa o tupulaga laiti nei.
Faaalia e nisi na molimauina vevesi, o le ta‘ape mai o le Youth Alive ae vaaia loa fusuaga a le tupulaga ma ua tuli e isi tupulaga isi ma na ta‘ua le lē fiafia o le fanau i Vaimoso i le faaiuga na manumalo ai Taufusi i le tauvaga lenei.

E lei faaalia mai pe o le ā tonu le tulaga o le ausiva a Vaimoso na tauva ma o le isi lea mafuaaga o le lē fiafia o matai o le nuu ona e fai o le leai o se tulaga i le tauvaga ae ua agai ane faamisa ma tamaiti o Taufusi.

E lē o le ausiva na vevesi ae o le tupulaga lava a Taufusi ia na vevesi ma tulai mai ai tau‘aigamaa e pei ona ta‘ua. O loo tālia pea leoleo poo le ā se faamatalaga i ni moliaga faasaga ia i latou.

Se tasi o ausiva i le Youth Alive – o le ausiva lea a Vailele na tulaga lua ae e lei maua mai se ata o le ausiva a Taufusi. O le tauvaga lea na mafua ai vevesi i le va o Taufusi ma Vaimoso lea na faasala ai le tupulaga a Vaimoso e le latou nuu