Ua faailoa mai ise faamatalaga mai le susuga ia Tuilaepa Faiai Reupena Kovati ose tamalii Samoa ua leva tausaga o galue i totonu o Aukilani ile galueaina o fualaau‘aina, e iai fualaau‘aina ua mafai nei ona fesoasoani i tagata ma‘i suka.

Ole susuga ia Tuilaepa Faiai Reupena Kovati oloo iai lana faatoaga i Waiuku ma oloo ia totoina ai tamato, ma isi ituaiga fualaauaina eseese e aoga ile soifua maloloina ole tagata.

Ae ua faapitoa le sunoaga a Tuilaepa Faiai ile taua ma le aoga tele ole tamato lea ua ia totoina aua le gasegase lenei ole suka. E lua ituaiga tamato oloo ia totoina i totonu o lana faatoaga, (1) Oxheart – Acid Free, (2) Roma-low acid, ole naunautaiga o lenei tamalii ole atunuu ina ia mafai ona iloa uma e tagata Samoa le taua ole tamato nei e lua ile soifua ole tagata, ae le gata i lea ia manino i tagata lautele oloo iai tupe oloo mafai ona galue ai le tagata i ona lima e pei o faatoaga.

Ile amataina ole totoina ole tamato sa faafaigata ia Tuilaepa Kovati ma lona aiga le tauamataina sa iai foi ni vaega sa sese ona faatino e pei ole faafaileleina ole laau i totonu ole palapala ole suiina ole fetilaisa aua le lelei ole eleele, aepeitai ua aluai aluai le tele o tausaga o faatino lenei faamoemoe, ma ua aoaoina mai ai le tele o mea e tatau ona fai aua le lelei atoatoa ole fua ole laau e tatau ona iai.

Saunoa Tuilaepa sa ia faaaogaina le pulu popo e toto ai le tamato, tau lava ina faamau ai le laau, ae o meaai uma ole laau oloo mafai ona fafaga ile fetilaisa. O taimi ole tausaga e toto ai le tamato o Setema, e tau loa le 8 ile 10 vaiaso talu ona toto ona sauni loa lea e amata ona piki seia oo lava ia Iulai poo Aukuso ile isi tausaga.

Ua iai nisi o aoga ua mafai ona latou asia lenei faatoaga i Waiuku e pei ole aoga faataitai ale Ataata lea ua faalua ona latou asiasi iai ma faamatala iai e Tuilaepa Kovati le taua ma le aoga ole tamato ile soifua ole tagata ae faapea foi i isi fualaauaina.

Ole tāua o nei asiasiga a fanau aoga ile faatoaga ua faamatala iai e Tuilaepa le taua ole lagomeli i totonu ole faatoaga, auā o latou ia oloo faafeusuaia fua o tamato lea o lo mafua ai ona maua mai fua o tamato. E tai lua pusa lagomeli e avatu ile tai fā vaiaso e faia lea galuega ina ia mafai ona feaveai le fualaau i totonu ole faatoaga e maua mai ai le fua ole tamato.

O nei galuega uma oloo faatinoina ile lelei ole tamato, oloo faatinoina uma lava ile maota o Tuilaepa Kovati i Waiuku, ma ose faatoaga ua silafia e lenei tamalii ole atunuu le tele ole tupe oloo maua mai ai aemaise ai oloo aoga lea mo le soifua maloloina ole tagata.

Na ia kilivaina le Foodtown i Aukilani aua e pei ole maketi lea sa iloa sa fiafia tele iai tagata faatau ae ole taimi nei o lea ua ia kilivaina le kamupani ole MG i Aukilani e faigofie ona agai iai tataga e fai mai ai a latou faatau.

Ole naunautaiga o Tuilaepa Kovati ia mafai ona faasoa atu ile atunuu ma fanau aoga le taua o fualaauaina ile soifua ole tagata aemaise ai ole faafaileleina seia oo lava ina tele. Oloo taumafai foi i sana polokalame faasemina i Samoa aua le talaiina iai o lea tala lelei mo le lautele ole atunuu.

Ole Aso Toonai ua mavae na faamatuina ai loa le 60 tausaga ole soifua ole alii faifaatoaga ia Tuilaepa Reupena Kovati ma e momoli atu ai alofaaga ma faamanuiaga o ona aiga uma mai Samoa, Niu Sila, Ausetalia aemaise o uo ma ē masani ile faamanatuina ole aso soifua ole tama, ae sili ai alofaaga ma faamanuiaga mai le tina ia Eseta Tuilaepa ma le fanau i Waiuku.