Ua alu le lua vaiaso o leaga le vaalele e lua ai vaalele o loo faatautaia femalagaa‘iga i le va o Amerika Samoa ma Samoa nei. O loo leaga se vaega o lea vaalele ma e tasi lava le vaalele lea ua faatautaia nei ia femalagaa‘iga.
O le tuua ai o aoga ma agai mai le toatele i Pago Pago mo faigamalologa i Samoa nei ua vaaia ai le faasolo atoa o faigamalaga a le Polenisia ma ua tulai mai ai foi le tele o faigamalaga ua tuai ona faataunuu ona o lenei faafitauli.
Faaalia e le Alii Palemia i se faatalatalanoaga ma tusitala i le faaiuga o le vaiaso ua tea, o lea ua faamautu e le Kapeneta le faatau mai o se isi vaalele mo lenei kamupani ona o le maualuga pea o le manaoga e tali atu i femalagaa‘iga i le va o malo e lua.
O lea foi ua agai mai le toatele mo le koneferenisi a le Ekalesia Metotisi lea ua usuia i lenei vaiaso ae ua toatele ua tuai taunuu mai i Upolu ona o le faafitauli lea o le lē lava o vaalele e tautuaina femalagaa‘iga i le va o motu e lua.
Ua faapea foi ona taofia femalagaa‘iga a le Inter Island, le kamupani vaa mai i Amerika Samoa talu ona leaga foi ana ia vaalele ma ua lē maua se laisene o le Samoa Air ua lē o toe fealuai foi la.
O nei faafitauli uma ua toe ave ai lava le faalagolago i vaalele a le Polenisia ina ia mafai ona faatino lenei auaunaga.
O lea e lei maua mai se tala poo afea o le a mae‘a ai galuega o le isi vaalele lea ua leaga a le Polenisia ma ua agai nei la le malo e maua mai se isi vaalele mo le Polenisia.
O le kamupani lea o loo totoe o le avefu‘a a Samoa talu ona faatau atu le tele o ona sea i le Virgin Blue, lea ua iai le Virgin Samoa o loo fealuai i le va o Samoa ma Niu Sila, Samoa ma Ausetalia ae na aveese lava le kamupani o le Polenisia ina ia faaauau ai femalagaa‘iga i le va o Samoa e lua.
E ui lava foi la i le laitiiti o lenei kamupani vaalele ae ua toe tatala ai femalagaa‘iga i le va o Fagalii ma Tafuna ona ua tele lava ina toe agai i ai ma Amerika Samoa e faaaogā le Polenisia.
Ua molimauina foi le agai i luma o taumafaiga a lenei kamupani i lana tupe maua i tausaga taitasi. O lea e lei mamao atu nei ona filifilia le alii o Alvin Tuala e avea ma pule sili o lea kamupani a le Malo lea sa tofia i ai le afioga Tauā Fatu Tielu i lona toe amata mai.
E lei faamautu mai e le Alii Palemia, poo le ā tonu lava le aso e tatau ona taunuu mai ai le vaalele fou mo le Polenisia ae na o le pau lea o lana faamatalaga i tusitala ua ioe le malo e aumai se isi vaalele ona o lea ua tele femalagaa‘iga ae ua tolopo ma ua tuai ona o le lē lava o vaalele e faatino ai le auaunaga mo le kamupani.
