Ua amata tapena e le Lakapi Liki a Niu Sila se taaloga ua fuafua lea i le va o Samoa ma Niu Sila mo le tausaga fou.
O lenei tala fiafia ua maua mai i le mae‘a o le siamupini a Niu Sila i le tauvaga o Atunuu e Fā lea na semau e faiaina i le Toa Samoa. Ua faailoa mai e le Lakapi Liki a Niu Sila o le a saili se aso avanoa lelei ae lei malaga taamilo le Kiwi mo Europa i le tausaga fou e pei ona faailoa e le Pule Sili ia Phil Holden.
O le faagaeetia o le pulega o le tauvaga 4 Nations auā o le taimi muamua lenei ua fefeu ai taaloga a Ausetalia, Egelani ma Niu Sila ina ua ofi atu Samoa. A faatusatusa atu isi au na iai muamua i le tauvaga e mamao lava sikoa sa lami ai Egelani, Niu Sila ma Ausetalia.
I le 2009 na toilalo popo Farani e 76-12 a le Kiwi toe faavavai e Ausetalia 42-4. I le 2010 o Papua Niu Kini na ofi atu ma lami tai limasefulu ai au malolosi. Sa faapea foi Wales na malolo uma foi e tai limasefulu ai.
E sefulutasi le aofai o sikoa a le Toa Samoa i ana taaloga uma e tolu, e sili atu ia Egelani na o le sefulu sikoa aofai.
O le auala foi o le taaalo a le Manu i le faaaogāina o le polo ma le taalo lusi i tele o taimi ua suia ai foi le matamata a tagata ma ua avaga ai le silasia a le lalolagi. Na saunoa le alii faapitoa mo le atinae o le lakapi liki a le Lalolagi ia Tas Baitieri, o le maoae o le sao o le Toa Samoa ua tatau ai lava avanoa faapei o le taaloga ma le Kiwis 2015.
Atonu o le a sosoo ai ma se valaaulia mai Ausetalia pe masii atu foi Egelani i Samoa.
Na saunoa foi Tas Baitieri e lagolago le talosaga a le faiaoga ia Matt Parish ma David Faalogo ia maua ni taaloga se tele auā le faaauauina o le Toa Samoa.
O se popolega ia aua ne‘i uma loa le 4-Nations ma nimo atu ai le Toa Samoa ae ia laalaa pea i luma ma taumafai auā le tapuaiga a Samoa atoa.
