Fuafua se fusuaga a Tua ma Holyfield

I le āsaina pea o le vaofita auā le toe fia maua o se isi avanoa o le afioga a Toaletai mo le fusi o le Lalolagi, ua oo atu nei lea faatofalaiga i se tasi o suafa iloga i le Lalolagi i faipelega o Evander Holyfield.

O le vaiaso na tea nei na faailoa mai ai i Amerika le faatalanoaga o se paga i le va o Tua ma Holyfield ma e ono faataunuuina i le aso 5 o Novema i le aai o Detroit pe a oo.
E ui lava e lei faamautinoaina sea fusuaga, ae ua oo atu nei le tulaga o le faatalatalanoa o itu uma (negotiating stage).

O Holyfield sa avea ma Siamupini o le Lalolagi muamua ae o se uo lelei foi a le afioga ia Toaletai i le tele o tausaga, ma o se tasi foi e tele sona sao i le taumafai a Tua, ma e masani foi ona faaaogā e Holyfield, Tua e faasipaina ia e pei o le taimi a o sauni le la fusuaga ma le alii o Mike Tyson.

Afai ae taunuu ma tau lau o lea faamoemoe, o se tasi o i laua nei e malo, o le a luiina loa le fusi o le Lalolagi i le Paga mamafa lea o loo umia e le alii Rusia o Vladimir Klitschko i le amataga o le tausaga fou.

Na pau le vaega faigata o le faamoemoe o le toalua lea e tusa o lipoti, ona o le maualuga tele o le vaai ma le faaaloalo foi o le isi i le isi i totonu lava ia o le faamalu o fusuaga faapolofesa, ma o le a lē faigofie foi ona tapena se fusuaga e ui o loo taumafai malosi i ai Pulega a nei alii Fusu e toalua.

Ia ae afai lava o se auala lea e vave toe oo ai le Tuaminator i le fusi o le Lalolagi, ia tatou faia ia le tala a le palagi, “Just bring it on”.