Fua mai le tauvaga pese a le Radio Samoa

O le faaosofia o lagona ma manatu o le susuga ia Soloi Keilani e toe lalaga ai se tasi o ana taleni sa soifua ae ma ia i totonu o lona aiga, o se fua aoga tele lea o le tauvaga pese sa faia e le Radio Samoa i le tausaga nei, na faamanatu ai le atoaga o le sefulu tausaga talu ona tautua mo le atunuu.
O le tauvaga sa faia, sa faaautu i le aso fanau o le leitio, ma na avea ai Soloi o se tasi o tagata pese sa tauva, mulimuli ane manumalo ai i lea tauvaga.
O le tapenaga a Soloi mo lea faamoemoe, sa avea ma auala na toe faafgu ai ma toe lalaga lona fiafia e ta le kitara, ma toe fatufatu ma tusia upu aemaise o le tau tuufaatasiga o fati e ususina ai pese.
O le miti ua toe amata ma ua toe manatua ai taimi o evaevaga i Samoa i totonu o nuu ma afioaga, aemaise ai sa toe aumai ai foi lagona a o toesea ma le atunuu, ae faatasi atu i Liberia i polokalame a le malo mo le puipuia o le saogalemu mo le umi e lua tausaga a o avea ma leoleo i le 1987 i le 1997.

Tupuaga o Soloi Keilani
O matua o le susuga ia Soloi, sa galulue tausinuu mo le tele o tausaga o se faafeagaiga taulagi i le paia o le Aiga Tauaana, i le nuu o Matautu i Falelatai, i le ekalesia Faapotopotoga Kerisiano Samoa, poo le LMS.
O ona tuaa o le susuga ia Keilani Tagoai mai afioaga o Iva, Sagone, Vaitoomuli ma Vailoa i Savaii.
O Mary (Mele) mai afioaga o Faatoia, Vaiala, ma Solosolo. Na tatala le feagaiga a Keilani ma Mele ma le ekalesia i Falelatai, ona siitia lea i Vatia i Amerika Samoa, seia oo ina malolo penisione mai ai.
E toatolu uso o Soloi o loo iai i le galuega a le Atua. O Malua Keilani e matua ma o loo galulue nei i le EFKS i Sini ma lona faletua. O Melani Keilani lona lua o loo faifeau ma le faletua i le ekalesia EFKS i Melepone i Ausetalia, ma le susuga ia Lauie Sila, o loo faifeau foi ma lona faletua i Brisbane i Ausetalia lava.

Soifua aoaoina
Sa aoaoina le susuga ia Soloi Keilani i le aoga maualalo a Apia Primary i Malifa, ona sosoo ai lea ma le aoga a Leififi Intermediate. O le kolisi a Channel ma le kolisi o Samoa (Samoa College) sa faaiuina ai le soifua aoaoina.

Galuega ma tiute
O le tausaga e 1987 agai i le 1990, sa ulufale ai i le matagaluega o leoleo, ina ua faamanuiaina auala uma sa uia mo le avea ai ma leoleo o le malo Samoa. O le vaitau foi lea sa filifilia ai i se vaegaau sa auina atu i le atunuu o Liberia, i lalo o le polokalame a le malo mo le puipuia o le saogalemu ma le filemu o lea foi atunuu. Sa toe taliu atu i le atunuu ina ua maea tausaga e lua sa iai i lea polokalame i fafo.
O le 1990 agai i le 2000, na iai sina suiga o fuafuaga i lea vaitaimi, ma tuua ai loa Samoa mo Amerika Samoa. Sa faaauau pea le galuega faaleoleo, ma auauna ai pea a o iai i le motu i Sasae mo tausaga e sefulu.
O le 2001 i le 2007, sa toe taliu ai i Samoa, ma toe faaaoga lava le agavaa i le matagaluega lava a leoleo. O le 2008, sa tuua ai loa Samoa mo Niu Sila o loo faamautu ai e oo mai i le taimi nei, ma o loo galue ai o se sikulati i le kamupani a le Fresh Security.
O le susuga ia Soloi o loo ia umia ni suafa matai e lua, o le suafa Seve mai le aiga o lona tama i Iva i Savaii, ma le suafa Muaimalae mai le nuu o lona tina i Vaiala. O ia foi o se tamā i totonu o le aiga, ma o loo faamoemoe i ai le tina ma le fanau i le tulaga o le tamaoaiga.

Luitau ma manaoga
O le taleni pese sa amata mai lava i totonu o le aiga, i le taimi o lotu afiafi faaleaiga. Na taua e Soloi, o le luitauina o lona olaga, ona o si ona tama, e masani ona faatonu ia te ia i le leaga o lona leo i le taimi e usu ai le pese o le lotu.
O faamatalaga sa sasa ai o ia e lona tamā ma faasea mai, ae na avea ma auala sa luitau ai ma manatu, o le a taumafai e pese atili ma faalelei lona leo, ma toaga e faataitai, ona pau lea o le auala e faamalie ai lona tama, ae o le a maua ai foi sona agavaa fou mo lona olaga.i le lumanai.
E lei umi se taimi sa tumau ai le fiafia e faia le taleni, peitai sa foi lava i le mea tuai, ma oo ai lava ina le toe fia faataunuuina ona o le faapalapala ma le augata.
Sa manatu ailoga a toe iai se lagona e faaauau le taleni, peitai o le taimi sa malaga ese ai ma le atunuu ina ua valaauina i le polokalame mo le saogalemu i Lyberia, o ina sa toe amata mai ai ona toe tau faataitai. O le malolo mai i galuega i aso taitasi, i le tigaina ma le le lava, ae pei e tiai ese pe a tago i le kitara e ta ma usu se pese. O le tausaga nei ina ua faalauiloa le polokalame a le Leitio Samoa, sa tusia ai loa e Soloi le pese e faatatau i le sini ma le autu o le tauvaga, peitai ina ua manumalo, sa matua le gata ina fiafia, peitai ua toe faamalosia atili, ma faamautu ai loa le manaoga, e toe faaiila ai le taleni, ma amata loa ona tuufatasia o musika ma fati, ma le faamoemoe e tuuina i le CD, ma ua tonu foi i le manatu o le a le toe solomuli, ae faaauau loa le taleni sa otegia soo ai e lona tama.

Faamoemoega mo le lumanai i le taleni pese
O le tausaga fou ua faamoemoe o le a oo mai i luga o le maketi le CD pese lona lua, o le sosoga o le CD numera muamua ua amata faatauina. O loo iai le faamoemoe o le alii pese, o le a agai pea i luma le savaliga ma le mautinoa o le faasinomaga lea ua aumai e le Atua.
O le cd lona lua e le o toe tele se galuega o totoe ae maea, ma ua faamautuina lava o le masina fou o le tausaga fou e tatau ona taunuu a ii luga o le maketi mo le faatauina.
O le kamupani a le Vision and Cassette World, le susuga ia Vili Ieru, sa fesoasoani mo le pueina o le CD, o se vaega o le maliliega sa osia ma i latou sa tauva i le tauvaga a le Radio Samoa 2009.