Fonotaga lona 40 a taitai o atunuu o le Pasefika

E talitonu taitai o malo o le Pasefika i le latou fonotaga lona 40 lea sa usuia i Cairns i Ausetalia i le lua vaiaso talu ai, o le faaaogaina tatau atoa ai ma le vaaia lelei e le au faifaiva o atunuu uma o le Pasefika, o lo latou ogasami ma gataifale e taua tele.
O lea manatu ua malilie uma i ai le au usufono ona o le talitonuga, o le isi lea faamanuiaga i le tulaga o taumafa atoa ai ma tupe maua mo tagata lautele pe afai e lelei ona vaai ma puipuia o latou lava ogasami ma gataifale.
Ua malilie foi taitai o atunuu ina ia matua faataua ma unaia le komisi o loo nafa ma le vaaia o le itu tau fagotaga, Western Central Pacific Fisheries Commission, ina ia mautinoa o loo gaoioi lea tino mo le manuia o fagotaga ma ia tele ni i‘a e maua e le au faifaiva mo le tamaoaiga o tagata Pasefika i soo se auala e faamanuia ai.
Ua faapea foi ona toe faamautuina le galulue faatasi o taitai ma le vaega a le (FFA) poo le Forum Fisheries Agency, ina ia mautinoa o loo malu puipuia pea aau ma ogasami i le atu Pasefika atoa, ina ia aua lava nei lepetia ma faaleagaina le sami nei faaitiitia ai le tamaoaiga e maua mai ai.
O le manatu o taitai, e tatau ona galulue faatasi uma matata eseese o loo tofu sao mo le puipuiga lava o fagotaga ma le sami.
O le WCPFC ma le pulega o puipuiga ma faasao (conservation and management) a le Pasefika atoa ai ma le FFA, e tatau ona galulue ma fesootai mo le vaaia o ni faafitauli mai fafo atu e taumafai e lepeti pe faaleaga puipuiga o le sami ma le au faifaiva.
O nei talanoaga uma sa talanoaina i le fonotaga a taitai, ua toe tuuina atu ai se faamalosi mo tino eseese uma ina ia toe faaopoopo se isi malosi e faamausali atili ai pea, ma aiaiga ua maea ona faataatitia po puipuiga uma.
Ua faapea foi ona toe tapa e le fono motu o Vavau ma Niue ina ia toe faamausali feagaiga ua maea ona sainia ma malilie i ai mai tausaga ua tuanai.
O ia maliliega sa tausisia mai lava e ia atunuu e lua mai tausaga ua mavae, o loo puipui ai le tulaga lava lea e tasi, peitai o le toe tatalo a taitai o le Pasefika ina ia toe silasila pea i ai, pe o iai nisi vaega e saga faaleleia atili ai gataifale ma ogasami mo fagotaga a tagata faifaiva.