O susuga i Faafeagaiga faapea le mamalu ole Atunuu sa auai ile fonotaga na talanoaina ai le tulafono o Eleele Faaleaganuu

O susuga i Faafeagaiga faapea le mamalu ole Atunuu sa auai ile fonotaga na talanoaina ai le tulafono o Eleele Faaleaganuu

Na tauaofia ni sui ole atunuu ile Aso Toonai aso 18 o Novema ise fonotaga sa usuia ile Meleniuma Hall ale Ekalesia Faapotopotoga Kerisiano Samoa Ausetalia Ipswich, le susuga ile faafeagaiga ia Rev Kerita Reupena ona ose fonotaga e faufau ma soalaupule ai ni finagalo e ave ai se mau e faatatau ile tulafono ua pasia ele Malo, LTRA 2008, Resitalaina o Eleele Faaleaganuu. Ole ‘auga moni ole fono i lea afiafi, ole fia fesiligia o finagalo o tagata oloo aumau i atunuu i fafo e tusa ai ma le tulafono ua pasia nei i Samoa ile Resitalaina o Eleele Faaleaganuu poo le LTRA 2008.

Ole pulunaunau atu la ole atunuu se’i aoao manogi ole lolo ma fetufaa’i ini auala e fia soalaupuleina, na foliga mai e autasi le tele o finagalo e tatau ona ave se mau. Na faafofoga sui sa auai a’o taumafai i latou ua tulai mai ile foe e faailoa i tagata le tulafono ua pasia ele Malo. Na talisapaia e susuga i faafeagaiga faapea Tumua ma Pule le mataupu i lea afiafi.

O tulaga ogaoga ma le aafiaga, ua lē maua ai se nofolelei o nisi o suli ma ua avea ose auala tau faafaamata’u e lē maua ai se to’afilemu, e ao lava ona faia iai se gaioiga.

Na ta’ua ele tofa ia Lalau Leaiataua Setefano, o ia ole sooupu ole Mau ma Kuiniselani, se faataitaiga e faapea, silasila faalemafaufau i tulafono faavae ale Palemene sa sau ai e tolu tausaga o faigapalota, ae ua fia ua iai nei?

O mea na faia e tagata e iai lava auala e toe suia ai. Ole ā le mea na tupu i tua atu ole 1991? Na palota na’o matai a’o lea ua tatala, ua palota tagata uma mai le 21 tausaga le matua. E iai ni manatu e faapea, e le ose pule faitoatasi ale Sa’o e afua ai nei fuafuaga ina ia umia ele Sa’o le pule saoloto o eleele ma fanua e aunoa ma se pule a se suli, ae ose auala ua faia ele Malo ina ia faigofie ai ona lisi atu eleele mo tagata faipisinisi mai fafo.

Oloo faagasolo pea fonotaga, ua mae’a Sini lea ua mae’a ma Kuiniselani ae oloo fuafua mo Melepone ae ole tutu faatasi e faigofie ai ona ā’ea se mauga. Sa auai susuga i faafeagaiga e pei ona iai Ps Taeauga Ropati Frost (Superintendent AOG Church of Samoa QLD) sa vaavaalua ma le susuga ia Rev Kerita Reupena ile sauniga lotu na tatala aloaia ai le fonotaga. Ole Komiti e aofia ai le Taitaifono ole Mau: Vui Masinamua; Failautusi: Le’aufaamulia Asenati Taylor (o lē sa avea ma faipule ole malo Niu Sila ise tasi o paeaiga ua mavae i lalo ole faamalu ale NZ First).

E lei malolo ise faigapalota ae ona o gasegase na aafia ai ma saili togafiti mai ai i Ausetalia lea ua fesoasoani ai ile Mau.

Faufautua: Tiumalumatua (Taitaifono ole Fono Faufautua a Samoa i Sini)

Faufautua: Tofua’iofoia I’uoātua mai Melepone

Faufautua tulaga faaloia: Tauā Maua Faleautō faapea Leuluaialii Olinda Woodroffe

Sooupu: Leiataua Lalau Setefano