Fono le Paa ma ona Vae, auā se manuia o tagata Lautele

Faolotoi Reupena Pogi ma Andrew Little (ogatotonu) ma nisi o sui faipule ma tagata lautele o loo lagolagoina le Labour Party
Faolotoi Reupena Pogi ma Andrew Little (ogatotonu) ma nisi o sui faipule ma tagata lautele o loo lagolagoina le Labour Party

O se taimi muamua lea ua mafai ona faatinoina ai e le faafaletui a le Labour Party ile itu i Saute o Aukilani, lea faamoemoe e pei ona faataunuuina i le afiafi o le Aso Faraile, 10 o Iuni ile faletalimalo a le Sudima Hotel e latalata ile malaevaalele.

O le sini autu o lenei feiloaiga ina ia auai sui a faipule a le Labour mai itumalo eseese, faapea sui o Komiti Faafoe o Pulega Faapitonuu (Local Board) mai itumalo taitasi ae lē gata i lea o tagata lautele e feiloai atu ai i le taitai o le Labour ia Andrew Little. O se avanoa foi e talatalanoa ai ma avatu ni fautuaga aua le agai i luma o le malo.

Sa faapea foi ona faatasi atu i ai le Konesula Aoao o le malo o Samoa i Aukilani ia Faolotoi Reupena Pogi ma sui o le itumalo faapea le aufaipisinisi ma faiaoga e lagolago le uluai faafaletui a le Labour i le itu i Aukilani i Saute.

Aua o le tele o taimi e le maua ai se avanoa e mafuta ma feiloai ai tagata lautele i le taitai ma faipule o le Leipa, ae o avanoa lelei ia lea ua tuuina mai e talatalanoa ma faasoa ai le pati ma tagata lautele i ni mataupu e aogā mo tagata lautele.

Na faaalia e le afioga ile faipule ia Su‘a William Sio, o le galuega lea a le party o loo faatino, e pei ona amata mai ai i Ueligitone, Kalaiesetete ma Dunedin seia faasolo mai i Aukilani.

O le afioga foi ile faipule sa ia faafeiloai le Konesula o Samoa faapea le mamalu o le atunuu sa auai, ona sosoo lea ma le saunoaga a le taitai o le Labour ia Andrew Little. Sa folasia ile saunoga a le taitai ma faamanino le faigapaaga ma le Green Party, ma faamanino tonu le mafuaaga o lenei osigafeagaiga tusitusia, ina ia galulue faatasi ile agai atu ile palota, ile sini autu, ia sui le faigamalo, ina ia mafai ai ona maua e tagata lautele se manuia.

O faigamalo ua iai nei, ua lē mafai ona toe tulai mai se pati se tasi e faatuina se faigamalo, se‘i vaganā ua faipaaga ma isi pati, e pei la ona faia nei e le Leipa ma le Green.

Ile taimi nei o loo tulai mai le faigamalo a le National, i lalo o faiga faapaaga ma le ACT Party, ma le Maori Party.

  Na maitauina le lagolagoina o le finagalo o le taitai o le pati i lea afiafi, ma ua tulimatai nei le faigapalota o le 2017 e taumafai ai e suia le malo.

Ua tele ma anoanoai faafitauli o loo tulai mai i lenei vaitau ile malo, ae tasi lava le auala e tatau ona agai i ai le atunuu, o le sui o le faigamalo mo le lumanai, ma sa vaaia ai lava le fiafia o le toatele sa auai i lea anavatau.