O le Afioga Tiafau Toleafoa Douglas Greevey le Alii Pule o le kamupani telefoni a le Bluesky Samoa na auai mai i se fonotaga i Sini nei ma le Telstra. O lea fonotaga a taitai ma faauluuluga o kamupani telefoni ma initaneti o le Pasefika sa aofia ai Tonga, Fiti, Samoa, Papua Niu Kini, Niue ma le Atu Kuki.
Na saunoa Tiafau Toleafoa, o le Bluesky ma le CSL lea e faatauina ma faaleleia masini komepiuta o sui ia o Samoa. i lea lava fonotaga sa talanoaina e sui eseese mai le Pasefika laasaga fou ua iai fesootaiga i telefoni feaveai, initaneti ma televise faauaealesi (Cable TV).
O le vaiaso talu ai na faaulufale aloaia atu ai e le Bluesky Samoa le Moana TV i totonu o le atunuu.
O lea auaunaga e faatusa i le Foxtel i Ausetalia. Na vaaia foi le faasoa atu o le Telstra i nisi o auaunaga e talafeagai mo atumotu o le Pasefika a o faafofoga sui na auai.
O le tulaga maualuga lea ua maoae ai le Bluesky ma lana auaunaga e pei ona auina atu ai le faaili iloga o le UB40 i le Tutoatasi. Na matuā faatumulia le Ala kalapu i le taunuu atu o lenei faaili tautaua ma e oo mai i le taimi nei o loo misia pea e le toatele. Na saunoa Tiafau e ui o le faigata o feutagaiga ma le UB40 ae peitai na muamua lava le tagai ina ia faamalieina Samoa i lona Iupeli Auro.
O le mae‘a o le tutoatasi o Samoa na toe lagolago ai foi e le Bluesky Samoa le au taaalo a Samoa i le Olimipeka lea na semanu e pine ai Ele Opeloge mo se taimi muamua ae pagā lea na toe faaletonu ana tapenga ona o se gasegase sa muai aafia ai.
O le afioga ia Tiafau Toleafoa na avea ma sui faasalalau ma fesootaiga ma Samoa faapea Niu Sila aemaise Ausetalia nei ma le FM89.3 na faafofoga ai le mamalu o le atunuu i taumafaiga a le TEAM SAMOA 2012 lea ua toe tapena atu mo Rio, i Brazil i le tausaga e 2016.
I faamaumauga ma le faatupulaia o le atina‘e o le Bluesky Samoa, e mātau atu e aulia atu le isi fa tausaga ua leai se eseesega o le tomai faaneionapo i Samoa ma atunuu tamaoaiga, e faafetaia ai le Bluesky Samoa. O le Aso Tofi na toe taliu ai le Malaga i Samoa.
