O le fono lona lua a le taitai o le Malo tele o Initia ma taitai o Malo e 14 o le Pasefika sa usuia i le aai o Jaipur i totonu o le laumua o lea atunuu o New Delhi, o se avanoa ua fofola atu ai e Samoa ni talosaga mo ni fesoasoani a lea Malo.
O le saunoaga a le Palemia o Samoa na folasia ai ia manaoga e pei ona laualuga le itu i le soifua maloloina. Ua tatalo le Palemia o Samoa mo se avanoa e mafai ai ona malaga atu ni fomai e lotolotoi i galuega tau soifua maloloina i falemai i Initia e maua ai se isi aoaoga e siitia ai le tomai faafomai.
Ua talosaga foi le Palemia i ni fomai mai lea Malo e malaga mai i Samoa ma galulue ai. Faaalia e Tuilaepa a maua se polokalame e fetufaai ai atunuu e lua i galuega faafomai o se isi lea avanoa e saga faaleleia ai le auaunaga faafomai mo Samoa.
O atugaluga o taitai o isi malo o le Pasefika i le mataupu i suiga o le tau na lagolagoina foi e le taitai o Samoa. Sa saunoa Tuilaepa ma ia faailoa le tāua i malo uma o le faamata‘u o suiga o le tau e pei ona ave le faamuamua i tapenaga ma polokalame e faafetaui ai manaoga o atunuu laiti o loo sili ona afaina.
Na faailoa foi e le Palemia o Samoa se tasi o vaega sili ona ma‘ale‘ale o loo faamata‘uina ai atunuu laiti o le faatupulaia o le salalau o aupega malolosi, fualaau ma pauta faasāina, le matautia o le faaaogāina o faamatalaga i auala televavave o fesootaiga faatekonolosi.
O le itu i le atinae o faiga faiva na faaalia e Tuilaepa e tatau ona galulue faatasi atunuu ina ia ausia maliliega faavaomalo e puipuia ai lea alaga‘oa o atunuu laiti e pei o Samoa.
Na faailoa e le Palemia o Samoa se fuafuaga e fia faatu se ofisa o Samoa i totonu o Initia ma avea lea se tasi o le a tofia i ai ma Amepasa. O se manaoga o le a iai se taimi ona faailoa lea o se isi laasaga o le a taunuu i ai.
Peitai o lea ua faailoa e le taitai o lea Malo le iai o se suiga ua faia e lana pulega malo o le lē toe manaomia lea o se visa e malaga atu ai tagata mai atunuu o le Pasefika i Initia. Ua ia tatala mai foi avanoa tau fefaatauaiga mo le au faipisinisi.
O lona uiga e lē tau faatali se talosaga mo se visa pe talia pe leai pe a fia malaga i Initia, ae na o le mautinoa lava o loo lelei le aogā o le Tusifolau, ma lava le seleni e faatupe ai se malaga ona tuuvaa loa lea mo lea atunuu, e lē gata o le au faipisinisi ae mo ē foi e fia malaga tafafao i Initia.
