Na faatumulia le Maota o le Tupulaga a le EFKS i Mulinuu i le Aso Faraile (taimi Samoa) na tea nei ina ua fofogaina aloaia le Anavatau a le Tautua Samoa.
O folafolaga ia ua mae‘a ona lipotia e tusitala amata mai i faamuamua o le uluai tolu masina pe a pale mai i le Malo, seia oo lava i fuafuaga mamao ua mae‘a ona maioio lelei i le Anavatau lenei a le Vaega Faaupufai.
O le ogatotonu o lenei Anavatau ua ta‘ua e le Tautua Samoa e ala i ona taitai ma ona sui na fofogaina vaega uma o lenei fuafuaga faataatia, o le faamāmā avega i le taugata o le soifua ua iai nei ma le fesoasoani i le tamaoaiga o Samoa.
Ua mae‘a fofogaina manaoga o le tafiesea o Casinos pe a tulai mai. Ua faamausali mai le ta‘i $130 tala i le tailua vaiaso o penisione a tagata matutua.
Ua faapea foi ona toe unai le faapa‘ū o le 5% mai le lafoga o taumafa (VAGST) ina ia tuuitiitia ai le tau o le soifuaga ma ua faamalosia mai le manaoga ina ia siitia le totogi o pulenuu ma sui o le Malo.
E lē gata i lea o le isi faamuamua o le a ave i le faamautu ai o le suiga o soo se tofi Palemia i le mae‘a ai o paeaiga e lua.
O ni folafolaga na mautinoa le lagolagoina e le toatele o le mamalu o le atunuu sa iai a o fofogaina le Anavatau lenei.
Na auai i luga o le pulelaa i latou na fililfilia o lenei vaega faapufai ina ia fofogaina vaega eseese o lenei taumafaiga ma o nisi na saunoa i le faataatiaga o le faamalosia o a‘oa‘oga a le fanau e pei o le faaauau ai o le tulafono e faamalosia le agai o fanau i aoga, i aoga maualuluga e pei o Kolisi a le Malo.
O le taimi lenei e gata i Vasega 8 le tulafono. O le va lea mai i le Aoga Tulagalua agai i Aoga Maualuluga lea ua ta‘ua e le Tautua Samoa ua maua ai le toatele o isi fanau ua faamaamulu ese ma a‘oa‘oga.
O isi saunoaga na taulai i le sailiga o auala e maua mai ai seleni mo le faamāmā avega o loo tauave e le Anavatau e pei ona laga ai le tele o le seleni e sili atu i le $10 miliona tala o loo alu i le totogi ai o Komiti o le Malo i Matagaluega uma ae a agai i le faaleleia o nisi atinae ua talafeagai.
Ua laga le manaoga ina ia taui i latou o loo taitaia nuu ona o le manatu e amata ona faasoa mai le tamaoaiga mai nuu ma afioaga ae lē o le taulai i le taulaga.
Ua iai fuafuaga e faaleleia ai le tautua o le aoina o aitalafu, ma le manaoga ina ia tuuitiitia aitalafu a Samoa i atunuu i fafo. Ua iai foi ma fuafuaga alualu mamao i taui o tagata faigaluega uma.
E lei iai se mea na tuua i faafitauli o loo lagalaga nei e le Tautua Samoa ma na oo lava nisi saunoaga ina fai ai ni faamatalaga masoā ona o le loto ita o nisi o sui tauva.
Na toe laga foi le faafaigata ai ona lesitala o nisi o sui tauva ma “omia ai le aiā tatau o loo faalauiloa pea e le HRPP”.
O le faatalatalanoaina o lenei Anavatau ua toatele ua manatu o le a faigata nei ona faatino nisi o nei folafolaga ma e leai lava se vaega faaupufai ua mafai ona atoatoa ni folasaga na fai i taimi e faalauiloa ai a latou Anavatau ae o le toatele foi ua manatu atonu ua iai se moni i saunoaga ma folasaga ua faalauiloa nei.
O le auiliili la o le sailiga a le tagata palota o le a fua mai ai le tali i le aso o le faiga fililfiliga.
Ua faalauiloa foi i le po a nanei le tali mai a le Alii Palemia i folasaga o le Anavatau a le Tautua Samoa, ma ua iai le manatu o le a tali auiliili mai foi le Alii Palemia i ia tulaga.
Ae o le vaaiga i le faalauiloa ai o manaoga nei o le Tautua Samoa ma le toatele o le atunuu ua faaalia lo latou lagolagoina, atonu o lea ua amata moni lava i lenei vaiaso le tausinioga mo se faigamalo fou o le Paeaiga lona 15 o le Palemene.
Ua amata ona faalogoina le malolosi o upu e lafo – ua foliga mai ua taaalo tino sui a faipule ae o lea e tele lava le taimi e faatino ai le filifiliga a le tagata Palota. Na faalauiloa ai foi ma le tofia o le Afioga Vaaelua Tofilau Eti Alesana e avea ma Peresitene o le Tautua Samoa.
O Vaaelua Eti o le alo o lē sa Palemia foi a le HRPP le Afioga i le Tootooalii Tofilau Eti Alesana. O le Afioga Vaaelua ua tofia nei ae see ese Afualo Dr Wood Salele lea sa Peresitene faavaitaimi e tālia ai se tofiga tumau.
O lea foi e tauva Afualo Dr Wood Salele i le itumalo o Salega ma o le tasi lea o mafuaaga ua faaalia e le Tautua Samoa ua talafeagai ai lava le agai ese o sui tauva faaolioli nei mai i le tofi lenei a le Vaega Faaupufai.
E lē o tauva Vaaelua i le Palota auā o lona tuafafine, Gatoloaifaana Amataga Alesana Gidlow lea o loo umia le isi nofoa o Faasaleleaga Numera Tasi ma o se Minisita foi o le Kapeneta a le HRPP lea sa ia vaaia ai le Matagaluega o le Soifua Maloloina.
O le mafuaaga na ta‘ua e lenei tamalii o le agai i le Tautua ona o lona manaoga ina ia suia le taitaiga o le HRPP – “E lē o le Pati ae o le tagata o loo taitaia, a faaauau ona taitai Tuilaepa Sailele i le isi lima tausaga ona ou alofa ai lava lea i le atunuu”.
O Vaaelua o se sui o le Tumuai tutusa lea na tuufaatasia ona sui ma sui o isi vaega faaupufai ia ua tauva uma i lalo o le fu‘a a le Tautua Samoa.
