Ole saunoaga ale Failautusi ole sosaiete a tausi soifua o Samoa le susuga Muliaga Lafai Tiamalo Joe, ose alii tausi soifua sinia e galue ose faatosaga, na tauau e lē oo le faailogaina ole selau tausaga o tausi soifua o Samoa, ona ua sasalu tapenaga ile fausia ose maota tele poo se multipurpose hall e faailoga ai le senetenari ae oo ane ile ogatotonu ole tausaga nei e atoa ai le selau tausaga e lei mautu fesootaiga ma le Malo ile fausia o lea galuega tāua.
“Ioe ole tulaga lena na tauau e mate ai le faamoemoe ae sa oso ifo se lagona e lē tatau ona tuua le faailogaina ole selau tausaga ona ole galuega ole fale sa moemiti iai le Peresetene ma le Sosaiete ae faatino pea.”
Ole sauniga amata ole senetenari o tausi soifua i lumāmaota ole Malo ile eleele fou na faate’ia ai tausi soifua ina ua saunoa le afioga ile Palemia ma faailoa ole a fausia e le Malo le maota o tausi soifua ile tausaga faaletupe o lumanai nei ile tausaga fou 2018.
“Ua faafofoga mai le afioga ile Minisita ole Soifua Maloloina ia faatino le galuega tatou te feiloai ai pea i lo’u ofisa ile tausaga faaletupe o sosoo ai nei, ae ia tautuanā ma le afioga ile Minkisita ia aua, aua, aua lava ne’i tuua’ia le Malo ile folafolaga lenei pe a lē taunuu”.
E oo ane le saunoaga ale Palemia ile vaega lea ae alu le taliē a tausi soifua ona o lea ua fofola atu ele taitai ole Malo io latou luma le folafolaga ile galuega ma ua silafia ai e lo latou minisita le afioga Tuitama Talalelei Tuitama e le tatau ona toe faaaloaloa nisi tala ile lumanai e faatau ile galuega. Ole sauniga i lumāmaota ole Malo ile taeao ole Aso Lulu ua mavae na faatumulia i alii ma tamaitai tausi soifua oloo galulue ile matagaluega ole soifua maloloina, ae e lei avea le matua ole soifua ma gasegase ole tino ua aafia ai nisi o tausi soifua ua malolo litaea ma mafuaaga ole nonofo ile fale ae sa auai atu foi e fia faailoa le latou lagolago ile faamanatuina ole senetenari ole galuega faatausi soifua i Samoa sa galulue ai ile tele o tausaga. Ole luitau ale Palemia ile sosaiete a tausi soifua o Samoa ia toe silasila ane lava pe o sologa lelei le faatinoga ole galuega. Na faailoa e le Palemia susuga Tuilaepa L Sailele Malielegaoi faafitauli oloo tutupu ma aliali mai ile galuega lenei ole fetuiai ma le maua ai se fealofaniga ile lotoifale o tausi soifua aemaise o faafitauli oloo tutupu pea ile pulega o lenei auaunaga tāua ile atunuu.
Sa malaga mai sui ole sosaiete i latou ua malaga ma galulue i fafo e pei o Niu Sila, Ausetalia, Tokelau ma Tonga.
Ole aumalaga lea na tatala ai polokalame ole senetenari ile ‘ava ole feiloaiga na saunia e le sosaiete a tausi soifua ae na auai ma sui ole Matagaluega ole soifua maloloina.
Ole po ole Aso Faraile na tea nei na faia ai le siva tele poo le ball na taualuga ai polokalame ole selau tausaga o tausi soifua o Samoa.
