Ua salalau tala ile palota a tagatānuu o Peretania ua pulupululima ai le toatele o lea atunuu e momotu loa sootaga o Peretania mai le toe avea ma sui ole Iuni a Malo Europa poo le European Union.
Ole mafuaaga lea ole malaga i Samoa ole Haikomesina o lea Malo e feiloai ma taitai ole Malo faapea sui o faalapotopotoga tumaoti ma isi vaega o auaunaga tau ile tamaoaiga ole atunuu, e faailoa iai le tumau pea o sootaga o Peretania ma Samoa e leai se mea ole a afaina ai ona ole aveesea o lona tulaga ose sui faavae ole Iuni a Europa. Faaalia ele Haikomesina o Jonathan Sinclair, ole a atili va tele ai le faitotoa o fesootaiga ile va o Samoa ma lona atunuu mo soo se fesoasoani ile atinae o e atunuu.
Ole saunoaga foi lea ale tamaitai Konesula o Peretania i Samoa le afioga Taulapapa Brenda Heather Latu, ina ua maua se feiloaiga ma le autusitala i Samoa. Faaalia e Taulapapa ole fesoasoani a Peretania ua siitia ai ile toalua ni tagata mai Samoa e maua le avanoa e faalautele ai le tomai mo le sailia oni faailoga maualuluga i totonu o Iunivesite i lea atunuu.
Ole sui muamua mai Samoa ae na ole toatasi na faamanuiaina ile tausaga ua mavae ina ua faalautele mai ilo tatou atunuu lea fesoasoani. Ole susuga Clayton Simamao oloo galue ise pisinisi tumaoti ae ile fia afe o alii ma tamaitai ole Pasefika na talosaga, o ia na filifilia ma malaga ai ia Setema ole tausaga ua mavae 2015 e sue lona faailoga ole Master i le auaunaga faataitai ile Iunivesite o Cardiff i Peretania.
Faaalia e Clayton ose mitamitaga lea ia te ia ona ole avanoa na ia maua ua mafai ona sue ai lona faailoga maualuga ae ua maua ai foi lona avanoa lelei e silasila ai i lea atunuu ma matau a latou foi tu ma aga ma le faatinoga o a latou galuega aemaise ole taitaiga ile pulea o galuega ma isi tautua.
“Oute iloa ose tulaga tāua tele le maua e isi tagata aoaoina ole atunuu o lenei avanoa auā e totogi ma faatupe uma e Peretania le fesoasoani”. Ole fiafia tele o lenei tamafanau ale atunuu ile avanoa na ia maua na ia tauaao ai se meaalofa mo le Haikomesina e pine faamau ai le agalelei o lea Malo.
Oloo faaauau pea sootaga o Samoa ma Peretania ma oloo tumau foi ana fesoasoani i soo se itu ole atinae ole atunuu.
