Foi i Samoa le sailiga manuia e faaauau le tautua i pisinisi

Ole tamaitai Pule Sili le afioga Segialii Vaaufiao Salevao Robertson ma se tasi o ofisa sinia le afioga Leituala Letelemalanuola Lupesoliai Savusa ole Kamupani ole Shalom Samoa
Ole tamaitai Pule Sili le afioga Segialii Vaaufiao Salevao Robertson ma se tasi o ofisa sinia le afioga Leituala Letelemalanuola Lupesoliai Savusa ole Kamupani ole Shalom Samoa

Ole tausaga e 2008 na malaga ai i Niu Sila le afioga Segialii ma lona aiga e aofia ai lona toalua le afioga Fulu’ulalefanua Falevao Robertson ma o la alo e toaiva ile faamoemoe e sailiili manuia mo aoga ale fanau ae faapea foi i nisi taumafaiga e maua ai se isi atinae lelei e tua iai le tamaoaiga ole aiga.

“E pei lava matou o isi foi o tatou tagata oloo malaga i fafo ole fia saili manuia, ae sa tupu pea i lo’u loto e toe fia foi mai lava i Samoa e faaaogā ai nisi tomai ma agavaa e fesoasoani ai io tatou tagata”. Ole finagalo amata lea ole afioga Segialii Vaaufiao Salevao Robertson ole tamaitai Pule ole kamupani ole Shalom Samoa lea na toe foi i Samoa ile masina o Aokuso ole tausaga nei ma amata ai ni taumafaiga tau pisinisi e pei ole okaina o taavale mai Iapani, ole fale taxi, ma le pisinisi su’isu’i e saunia ai laei eseese.

“O a’u oute lē faatali sei tele ni tupe ona faatoa fai lea ose atinae. E ia te au le lagona foi lele ole aua le faatali, o ā mea ua maua i lena taimi fai loa ae faalagolago ile Atua e fesoasoani mai ise taumafaiga”.

Ole nofoaga o pisinisi ale tofa Pa’u Sefo i Motootua oloo iai le ofisa autu ole Shalom Samoa ma na faaalia e Segialii ole aso 20 ole masina nei e taunuu ai le uta muamua o taavale a nisi ole atunuu ua oka e lana pisinisi.

“E toatele nai o tatou tagata e lē malamalama i auala e faasao ai seleni auā a ou vaai i tau o taavale oloo faatau e nisi o auaunaga i Samoa e taugata tele mo nai o tatou aiga lima vaivai, ae ole oka sa’o mai ose taavale (second hand) ile matou tautua e taugofie atu lea”.

Na momotu le talanoaga ma le tamaitai pule ae tuu fesilisili pea le tusitala ile afioga Segialii pe ole ā sana silasila io tatou tagata ua nofomau i fafo, o nisi ua tele tausaga o aumau ai ma e iai lava i latou ua toe foi i Samoa ma faia ai nisi taumafaiga tau pisinisi mo le manuia o aiga ae o nisi foi ua lē ole taunuuga lea o lo latou malaga ese ma Samoa ae tuua aiga.

“Ole luitau lena sa fetaia’i pea ma a’u ina ia ou toe foi mai ma lo’u aiga e faia se sao io tatou tagata”. Na saunoa le faletua o lona fatu atoa o Samoa i ona aiga ma ina ua malaga ese ile tausaga e 2008 aumau i Niu Sila sosoo ai ma le siitia atu ma faamautu i Ausetalia ile aai o Melepone sa lē motusia le malaga mai lava i Samoa e asiasi i aiga ma faalavelave masani ae e tupu pea lona lagona e fia foi ile atunuu mo nisi taumafaiga.

“Ole ma fuafuaga na iai e atoa loa le sefulu tausaga talu ona matou faamautu i fafo foi mai loa e faia ni pisinisi e tautua ai nai o tatou tagata aemaise o lo tatou atunuu ma le Malo, lea la ua toetoe lava atoa le sefulu tausaga ae ua matou o mai e faatino le matou miti”. Fai mai Segialii o pisinisi a o tatou tagata e tatau ona lagolago e tagata Samoa.

“Ole mafaufau lea oloo iai tagata Saina e alu le isi e opogi ma lagolago le isi Saina ma oute manao e faapena foi o tatou tagata, ae ole faalavelave lea e iai ole pride foi lele o tatou e lē fia alu le isi e sii i luga le isi ae ana pei o Saina e ese le manuia o tatou taumafaiga”. Ole agaga ole tamaitai pule a galulue faatasi tagata Samoa ma fesoasoani le isi ile tasi e lē taumateina e ola pisinisi a tagata Samoa ma maua ai le sipili e tauva ma pisinisi a isi tagata oloo i Samoa.

Ole afioga Segialii sa galue ile auaunaga tau fesoasoani ale SPBD poo le South Pacific Business Development oloo maua ai nonogatupe laiti mo pisinisi a tina ma tamaitai ile atunuu. Ole galuega lea na faaalia e Segialii na faaosofia ai lona loto fia atinae e pei o isi foi tina ma tamaitai ole atunuu.

Ole isi foi lea luitau moi ia ina ua galue ile SPBD ona na ia ta’ua sa leai sona fiafia tele ile aganuu faasamoa pe a faafesagai ma sui o nuu ma afioaga peitai ina ua ia galue ai i lea auaunaga ma maua lona avanoa e feiloai ai ma sui o nuu ma afioaga na ia maua ai se isi a’oa’oga tele mo ia ile tāua ole faasamoa.

“E ese ma le tele ose a’oa’oga na ou maua ai, auā ua ou iloa ai le taua ole faaaloalo ile aganuu faasamoa, o taimi oute feiloai ai ma ni sui o nuu e sagisagi fiafia mai ma faatino tatou aganuu masani i faaaloaloga ma isi vaega ma sa ou faapea ane ai, o ai ea a’u ua ou maua ai ia faaaloaloga mai nai o tatou tagata. Ole lesona tele lea mo a’u ma na unaia ai a’u oute lotolotoi i mea fai faasamoa oloo faasoa ai le aganuu”.