Na masii mai le faipule o le itumalo, Afioga Fiame Naomi Mataafa
O le amataga o le tausaga nei na tauaaoina ai se tusi mai Samoa e le mafutaga a Lotofaga, o se faatalauula sa tauala mai i le afioga i le Sa’o Faapito, Fiame Naomi Mataafa, o le faipule o Lotofaga, faapea le susuga i le faafeagaiga EFKS, Rev Iosefa ma le faletua ia Cekie Uilelea ma le paia i le Ekalesia i Lotofaga, i se fesoasoani mo le toe fausiaina o le malumalu tapuai i totonu o le afioaga.
O le tusi na tauaao mai e le afioga i le taitaifono i sana malaga i Samoa ma lauina loa i le mafutaga, ma faapea ona taliaina fiafia e le paia i alo ma tamafanau faapea paolo ma gafa e malu ai Lotofaga i Brisbane nei.
Na soalaupule ma fefaasoaai finagalo ma maua ai le tasi o le Aso Toonai aso 16 o Iuni e faataunuuina ai se tusigaigoa aua le faamoemoe ua folasia i lumamea. Na tuua ai tiute ma tofi faalemalo o le afioga i le faipule, ae malaga mai i le Aso Faraile na tea nei ona o le fia auai. Na faia se latou feiloaiga i le po o le Aso Faraile ma le mafutaga a’o lumanai ai le faamoemoe i le Aso Toonai. Na faagaeetia le paia i le mafutaga ona ua maualuga lo latou faamoemoe ona o le afio mai o lana afioga i le Sa’o Faapito ua lagona ai le loto tetele.
E ta ane le 9 i le taeao o le Aso Toonai, ua amata faatumulia le hall a le Woodridge State High School i le pitonuu o Woodrige i le paia ma le mamalu o le atunuu na faatasi atu e opogi le faamoemoe o Lotofaga. O se tasi o taulaga soifua o se lupe faalele a le alalafaga le susuga ia Rev Isamaeli Lia’ina o loo galulue i le ekalesia EFKS ma le faletua ia Kuinivia Lia’ina sa fai ma ositaulaga o le sauniga amata i le Aso Toonai ua tuanai i le afa o le iva i le taeao.
Na faagasolo le polokalame e ala i le tusia o le aao foai o le atunuu, tauaiga ma uo faapea e masani ia Keriso ma faasolo siva samoa a le mafutaga. Na fai ma fofoga o le aso le susuga ia Sitagata Aso’ai Nonu, ae o le susuga ia Sitagata Uatoto Leumu na malaga mai Samoa sa tulai e fai ma sui o le mafutaga e momoli le agaga faafetai i le paia i le aufaigaluega a le Atua faapea Samoa na potopoto ona o le aao mafola.
Na faia foi le faatau paia a Tumua ma Pule, ma tasi moemoe ai i le fetalaiga i le tulafale alii ia Fiu Vaigāfā e faafetaia le mafutaga ona o faaaloaloga ma le maualuga o le aso. O le aao mafola o le atunuu ma i latou sa auai na faamaopoopoina ai le seleni paia e tusa ma le $50,227.90.
E itiiti ae maini, e ui e na’o le 8 matafale, ae na fai lava ua mafai aua na le gata i tauaiga ma uo ae tainane nisi ekalesia EFKS faapea susuga i faafeagaiga ia Rev Safiti Iupati ma le faletua, Rev Faafetai Setefano ma le faletua faapea le susuga i le tausi matagaluega ia Rev Matuu Taufua o le ekalesia Metotisi Faasinoti a Kuiniselani. Na auai foi nisi o taitai o mafutaga e pei o le afioga ia Taefu Patea Pesamino ma le faletua ia Tina Taefu o le Tofa Saili ma le toatele lava o i latou na togimaa faatasi i le faamoemoe.
O le mafutaga ua faavae nei, o se uluai taimi lenei ua fai ai se sailiga seleni talu ona tauaaoina le tusi mai Samoa mai le ekalesia EFKS a le alalafaga o Lotofaga.
E pei ona silafia e na’o le lua ekalesia tetele i Lotofaga, e iai le Ekalesia EFKS faapea le Katoliko o loo i le aai. O isi ekalesia e pei o le Ekalesia a Iesu Keriso o le Aupaia o Aso e Gata ai ma le AOG o loo i uta e pei ona saunoa iai se sui o le laulau.
Na faamalieina le auvalaaulia i le taumafataga na saunia e le Uncle Sam’s Take Away, ona lūlū aoao ai lea ma taape le fuamanusina. Na toe taliu le faigamalaga mamalu a le afioga i le sui palemia poo le faipule o le itumalo i le Aso Sa ua tuanai ina ua mae’a le faamoemoe ona o tiute ma faiva faalemalo. O le ofisa o le mafutaga a Lotofaga i Kuniselani – Taitaifono: Afioga Le’aenailesolo Viliamu Tuatagaloa; Sui taitaifono: Susuga Sitagata Aso’ai Nonu; Failautusi: Tauiliili Nanai Lupematasila Fetuna Tomasi Sa’u; Teutupe: Faamomoi Su’a.
