Foai Woolongong Ausetalia mo Falealupo

O le masani o le galuega fesoasoani a le Kalapu a le Roteri (Rotary) a le Lalolagi, ua fesootai atu i ana kalapu i itu eseese o le lalolagi e moomia se fesoasoani ma o iina e faatino ai se foai ua o latou aoina.

O le faaiuga o le vaiaso na tea nei na agai sa‘o mai ai lava se lala o le Rotary i Ausetalia ma avatu sa‘o le fesoasoani i le sui o le afioaga o Falealupo, le afioga i le faipule Aeau Peniamina Leavai sa talosaga sa‘o atu mo se fesoasoani auā le faalautele ai o le atinae o aoaoga i totonu o le afioaga faapea isi nuu tuaoi o lea itumalo.

O se tasi o alo o le tamā ia Aeau na tusi i lea lala o le Rotary ma le manatu e leai se sootaga ma le Rotary Apia ae o le a taumafai pea ona o le fia maua vave o ni meaaoga e lē o mafai ona tāpā ai le fesoasoani a le Matagaluega o A’oga, Taaloga ma Aganuu.

O le fesoasoani la na tauaao atu e sui e toafā o le Rotary Woolongong mai i Ausetalia ua aofia ai masini laptops o computers o tusi faitau ma isi tomai tau fesootaiga faaonapo nei auā le fanau o le aoga laitiiti a Falealupo faapea isi aoga o nuu tuaoi.

E lē gata i lea ua lava pusa tusi aoga na aumai ua lē gata mo aoga i Savaii ae ua faapea foi ona tuu atu nisi tusi faitau i le faletusi a le Aoga Aso Sa a Vini fou lea e faiaoga Aso Sa ai alo o le alii faipule.

Na o le faafetai lava o le alii faipule ona o le vaaia o le tele o nei masini o le a mafai mo le taimi muamua ona faaaogā e fanau, ma o le faamoemoe e agai lava foi alo o le alii faipule atoa ai nisi e mafai ona fesoasoani i le unaia o aoaoga a le fanau ina ia mautinoa le alu aogā o nei meaalofa ona o le itu lea ua vaaia o le tele o fesoasoani faapenei ua aumai ae e leai nisi e mafai ona aoaoina i aoga i nuu i tua le tomai faa fesootaiga lenei i computers ma e mae‘a ane le tausaga ua lē aogā masini, ua ave e nisi pe ua na o le tutū ai lava e faaaogā e i latou o le afioaga e mafai ona faaaoga ae e lē pa‘i lava i ai fanau.

O le faamoemoe o le fesoasoani lenei ina ia mafai e fanau laiti o Falealupo ona faaaogā computers ma ia aogā ia latou meaaoga i le faasolo ai i luma o le taumafai i meaaoga. Faaalia e sui o le Rotary Woolongong o le a o latou matauina lenei fesoasoani ma ia avea le uluai feiloaiga lenei ma amataga o taumafaiga e unai ai le fanau ma lo latou soifua lelei i lea itu o le motu tele i Salafai.
Nisi o masini computers sa foai mai e le Rotary Woolongong mai i Ausetalia

Sui o le Kalapu a le Rotary na tauaao maia le foai i le sui o le afioaga o Falealupo, le afioga i le alii faipule, Aeau Peniamina Leavai