O le umukuka ua mafai ona feaveai i soo se nofoaga ua tulai mai ai faalavelave faalenatura. Ua teu ai ipu o sipuni, o ulo falai, tipoti ma isi totoga e pei lava ona vaaia i umukuka o soo se maota. Ua iai ma nofoaga e faamautu ai fagu kesi ma le ogaumu e gasese ai taumafa i nofoaga e lē o toe maua ai taumafa i taimi o puapuaga e tulai mai.
O se meaalofa lenei a se alii Siamani o le aai o Hamburg ma lona aiga ua auala mai i le faalapotopotoga o Uo a Samoa i le aai o Hamburg i Ausetalia.
O le vaavaai o lenei alii i le tulaga sa iai puapuaga o Samoa i le vaitaimi o le tsunami o le 2009 lea na faapea ona manatu ai e moomia lava se ituaiga fesoasoani faapenei aemaise i nofoaga ua lē toe ola ai le eletise, leai ni totoga e gasese ai taumafa i se taimi vave lava, ma e na o le pau lava le galuega e fai i ai, o le iai o se taavale e mafai ona sii i ai le umukuka lenei ma agai loa i nei nofoaga.
Faaalia e le faauluuluga o le tautua o Tali i Faalavelave Faafuasei, o ia foi o le Komesina o le Tineimu i Samoa, le susuga Tony Hill, e maeu foi le agalelei o lenei alii e suafa ia Wolfgang Drewes, ma le taumafai lava e momoli mai lenei vaega tāua o le auaunaga.
O se alii Siamani lenei sa galue foi o se alii tineimu i le vaega o tali o faalavelave faafuasei i Siamani. O loo i Samoa e tafafao mai ma lona aiga ma ua avea ma avanoa e momoli sa‘o mai ai lava e ia ma lona aiga lenei fesoasoani, ma ua iai le faamoemoe e teu lelei lea fesoasoani i le Ofisa o le Tineimu i Apia auā le tali atu ai i le ono tulai mai o se manaoga faapea i le lumanai.
E $15,000 (tala Samoa) le tau atoa o le fausia ma le tuufaatasia o lenei masini ua faapea ona aumai i Samoa, ma na ta‘ua e lenei alii e oo atu i le to‘a 600 tagata e mafai ona fafaga i le taimi e tasi mai i taumafa e gasese i le taimi e tasi i lenei umukuka, ma na ia ta‘ua a lelei lava ona vaavaai ma tausi faalelei e le Ofisa o le Tineimu lenei umukuka, o le a tele aogā e mafai ona tali atu ai i taimi o faalavelave faafuasei ma faalavelave faalenatura.
O le kalapu poo le asosi lea o uo a Samoa i le aai o Hamburg i Siamani, o i foi na agai mai ai ni taavale fuimu laiti se tolu mo lea lava auaunaga tāua i Samoa, ma o loo faaauau ona asiasi mai sui o lea asosi i Samoa e fesootai pea mo nisi fesoasoani e mafai ona ofo mai e lea aai mo Samoa nei.
