E lua ni aiga ua maua i lenei vaiaso se fesoasoani mai le Faalapotopotoga fesoasoani faavaomalo e ta‘ua o le Soroptomist e ala i ni ogaumu e ola i le malosiaga maua mai i le lā, auā le gasesega o taumafa a ia aiga.
O nei ogaumu na tauaao atu e Douglas Allington, o se sui o le Soroptomist Faavaomalo ma o lana galuega o le aumai i Niu Sila o ituaiga ogaumu ia e ola i le malosiaga o le lā ma ua faapea ona tele tausaga o asiasi mai pea i Samoa.
O le Faalapotopotoga lenei ua faaigoaina o le Soroptomist o se Faalapotopotoga ua faatuina e tamaitai i itu eseese o le lalolagi ina ia unaia le atinae o tamaitai i soo se vaega o le soifua aemaise lava ina ia avea ma tagata e atinae o latou aiga ma aveese ai le ola mativa ae faamalosia ai tamaitai i o latou tulaga o tausi aiga, o taitai i galuega aemaise foi upufai o malo.
O se Faalapotopotoga ua tele tausaga o i totonu o Samoa ae o le latou taulai lava lea o le faatino o galuega e mafai ona fesoasoani ai i tamaiti o soo se afioaga.
E fā ogaumu faapea na malaga mai ma lenei alii ma o Laulii ia na tauaao atu ai le lua o ia ogaumu. Ua faaauala mai lenei fesoasoani i se kamupani Niu Sila e ta‘ua o le S.I.Westland.
O le isi vaega o lenei foai o le a faataunuu ia Novema o le tausaga nei. O le tamaitai ia Sally Betham o le Soroptomist na malaga faatasi ma lenei alii ia Allington e tauaao atu lenei foai i le aiga o le tina ia Malaetele Fausia ma le aiga o le isi tina e suafa ia Ainoama Talimalie o le afioaga lava o Laulii.
E toatele na agai i fale o nei tina mo le tauaao atu o ia ogaumu. Na malaga mai foi le sui o le Soroptomist mai i Niu Sila ma le Pasefika o Dianne Lockwood, o le faatonu o polokalame a lea Faalapotopotoga i Saute i Sisifo o le Pasefika o Dr Shikha Raturi.
“E tailua tausaga ma fai lenei fesoasoani i itu eseese o le lalolagi ma e filifili le Soroptomist i fesoasoani e faatino i vaega o loo iai ona lala, ma o fesoasoani e fesoasoani ai i le atinae ma le faamalosi o tamaitai ma tina o le lalolagi.
Ma o le tausaga lenei na filifili ai se tamaitai na Peresetene muamua o le Faalapotopotoga aoao o le Soroptomist ia Ann Garvie mai i Peretania ma faapea mai ai e unai fesoasoani e ala i ogaumu nei ma le eletise e maua mai i le lā,” o le faamatalaga lea a Dr Shikha Raturi.
O lea ua mae‘a aoaoga ua faatautaia e le alii na malaga mai ma nei ogaumu mo aiga ina ia silafia le auala e aoina ai le malosiaga o le lā mo le faaola ai o ogaumu nei.
