Foai Leoleo Kalaiesetete i le aoga a Satitoa

A o i Samoa le alii leoleo o Constable Craig Francis e galue faakamuta i se ofo a le faalapotopotoga o fale mai i Niu Sila o le Habitat for Humanity, na maua lona taimi e asiasi ai i afioaga aemaise o a‘oga na aafia i le sunami o le tausaga na tea nei.
O lea asiasiga e tāua tele, ona na ia ta‘ua e iai se fesoasoani na malaga mai i Samoa e tauaao atu i le falea‘oga o Lalomanu.
O Constable Francis o se alii leoleo i le Ofisa Tutotonu o Leoleo i le aai o Kalaiesetete i Saute o Niu Sila.
O loo galue o ia i lalo o le vaavaaiga a se alii leoleo Samoa, o se alo faasino ia Lalomanu, o Satini Sinia (Senior Sergeant) Neru Leifi i le ofisa i Kalaiesetete.

Ina ua logo tala le ofisa o leoleo o lea aai, o le a malaga Francis ma nisi o lea aai e ofo fua lo latou taimi e fausia ai maota ua faaleagaina ona o le sunami, na potopoto loa ae ao se latou lava seleni auā se meaalofa mo le a‘oga laititi a Lalomanu.
O le asiasiga la i Lalomanu a lenei alii leoleo na fautuaina ai o ia e sui o le afioaga o le a‘oga tulagalua a le afioaga o loo malupuipuia ma e lei afaina i le sunami ona e maouta le nofoaga o loo fausia ai.

E lē gata i lea ua mautu le potu o masini computers a Lalomanu i le taimi lenei ma o loo ua faaaogāina pea e le fanau e oo mai i le taimi nei.

O le fautuaga na avane e le aiga o Satini Sinia Leifi, e manaia ae asiasi Francis i se isi afioaga o le atu Aleipata lava poo ai se a‘oga o loo matuā moomia sa‘o lava lenei ituaiga fesoasoani.

O lea na faaauau ai le asiasiga a lenei alii ma o le afioaga o Satitoa lea ua matuā leai se falea‘oga ona na talepe e le galu ma ua tafiesea, na taulai ai loa lea fesoasoani.
O le tupe na aoina e silia i le $5,000 (tala Samoa) na faatau ai loa le masini computer, o le masini lolomi, o le masini e fai kopi ma pu‘e ai ata mo lomiga (scanner) aemaise o meataalo mo le faamalositino a le fanau ma tauaao atu ai loa i le a‘oga tulaga lua lenei.

O se maota o le afioaga lea ua faatautaia ai nei a‘oa‘oga a le fanau e tusa ma le to‘a 170 o le afioaga o Satitoa a o talia ai se galuega a le Malo o loo faataatia i le taimi nei mo faleaoga e toe fausia.

E toafā faia‘oga o loo faatautaia a‘oa‘oga a le fanau i lea afioaga ma ua matuā leai lava se masini e faatino ai galuega a le ofisa o lenei a‘oga a o tālia se fesoasoani.

O le agaga faafetai na faaalia e le faauluuluga o lenei a‘oga ona o le mafai ona taulai atu lenei fesoasoani i si a latou a‘oga, ma o le vaiaso lenei ua toe a‘e ai aoga a le fanau ma ua talafeauga lelei ma le fesoasoani ua avatu e ia Samaria agalelei.